आफ्ना ग्राउन्ड सर्भिस कर्मचारीहरूको चार दिने हड्तालका कारण स्पेनी एयरलाइन इबेरियाले चार सयभन्दा बढी उडान रद्द गरेको छ । मुलुकको प्रमुख बिदा एपिफेनीको पूर्वसन्ध्यामा एयरलाइन्सको उडान रद्द शुक्रबारदेखि सुरु हुनेछ ।
स्पेनको युजिटी तथा सिसिओओ युनियनहरूसँगको वार्ता बिना कुनै सम्झौता बुधबार राति समाप्त भएपछि इबेरियाले एक विज्ञप्तिमा भनेको छ, “उडानहरू रद्द हुँदा एयरलाइनको कम लागतको इबेरिया एक्सप्रेस र यसको क्षेत्रीय एयरलाइन एयर नोस्ट्रमलाई पनि प्रभावित बनाउने छ, यसबाट ४५ हजारभन्दा धेरै यात्री प्रभावित हुनेछन् ।”
इबेरियाका कर्पोरेट निर्देशक जुआन सिएर्कोले हडतालबाट यात्रीहरूलाई ‘धेरै महत्त्वपूर्ण’ अवरोध हुने उल्लेख गर्दै अन्तिम समयमा रद्द गरिएको भए पनि उडानहरूलाई पुनःतालिका बनाउन असम्भव हुने बताउनुभयो ।
स्पेनमा परम्परागतरूपमा क्रिसमस उपहार एपिफेनीको दिन अर्थात जनवरी ६ मा दिइन्छ । उक्त दिन इसाईहरू शिशु येशुसँग भेट गर्न तीन राजाले भ्रमण गरेको सम्झना गर्छन् । यसको एक रातअघि पूरै देशमा रङ्गीन परेड आयोजना गरिन्छ ।
धेरै स्पेनीहरू बिदाका लागि आफ्ना परिवारका साथ भ्रमण गर्दछन् । यसलाई थ्रि किङ्गस डेका रूपमा पनि जानिन्छ ।
ब्याग ह्यान्डल गर्ने पनि समावेश भएका इबेरियाका ग्राउन्ड सर्भिस कर्मचारीहरूले राज्य नियन्त्रित विमानस्थल सञ्चालक एनाले नयाँ प्रदायकहरूसँग हस्ताक्षर गरेको सम्झौताको विरोध गरिरहेका छन् ।
नयाँ प्रदायकहरूले इबेरियाका कर्मचारीहरूलाई कायमै राख्ने वाचा गरेका छन् तर उनीहरूको कामकाजी अवस्था बिग्रने डर युनियनहरूलाई छ ।
प्रतिक्रिया राख्नुहोस्