अमेरिकी राष्ट्रपति निर्वाचित डोनाल्ड ट्रम्पले डेनमार्कको स्वायत्त क्षेत्र ग्रिनल्याण्ड कब्जा गर्न सैन्य कारबाही गर्ने सम्भावनालाई अस्वीकार नगर्नुभएपछि जर्मनीले बुधबार उहाँलाई सीमाहरू बलपूर्वक परिवर्तन गर्न नहुने बताएको छ ।
जर्मन सरकारका प्रवक्ता स्टेफेन हेबेस्ट्राइटले संयुक्त राष्ट्रसङ्घको बडापत्र जस्ता अन्तर्राष्ट्रिय सम्झौताहरूलाई औँल्याउँदै ट्रम्पको टिप्पणीको जवाफमा भन्नुभयो, “जहिले पनि दृढ सिद्धान्त लागू हुन्छ… कि सीमाहरू बलपूर्वक सार्न पाइँदैन ।”
मङ्गलबारको एक पत्रकार सम्मेलनमा ट्रम्पले ग्रिनल्याण्ड र पनामा नहरको विषयमा सैन्य हस्तक्षेपको सम्भावनालाई अस्वीकार गर्नुभएन । ग्रिनल्यान्ड र पनामा नहरमाथि उहाँले संयुक्त राज्य अमेरिकाको नियन्त्रण चाहेको बताउनुभएको छ ।
ट्रम्पले संयुक्त राज्य अमेरिकाको उत्तरी छिमेकी क्यानाडासँगको सीमालाई ‘कृत्रिम रूपमा खिचिएको रेखा’ भन्नुभएको छ भने मेक्सिकोको खाडीको नाम ‘अमेरिकाको खाडी’ राख्ने वाचा गर्नुभएको छ ।
हेबेस्ट्राइटले नाटो सहयोगी डेनमार्क र क्यानाडाविरुद्ध ट्रम्पको धम्कीलाई जर्मन सरकारले गम्भीरतापूर्वक लिएको छ कि छैन भन्ने बारेमा टिप्पणी गर्न अस्वीकार गर्नुभयो ।
“म ती टिप्पणीहरूको मूल्याङ्कन गर्न चाहन्नँ”, उहाँले नियमित पत्रकार सम्मेलनमा भन्नुभयो । उहाँले जर्मन सरकारले तिनीहरूलाई ‘नोट’ गरेको मात्र जोड दिनुभयो ।
प्रतिक्रिया राख्नुहोस्