देशका विभिन्न स्थानमा आगलागीबाट विभिन्न धनमाल जलेर नष्ट भएको छ । खोटाङ, खोटेहाङ गाउँपालिका-७ पुरानागाउँ बस्ने तुलसीराम चौलागाईको मतान घरमा मंगलबार राति आगलागी हुँदा नजिकै रहेको उनको घर र २ वटा मतान घरमा समेत आगलागी हुँदा घर, मतान घर, नगद २ लाख ५० हजार रूपैयाँ लत्ताकपडा, भाडावर्तन, अन्नपात, काठपात, ४५ वटा बाख्रा समेत जलेर करिब २२ लाख रूपैयाँ बराबरको धनमाल नष्ट भएको छ ।
त्यस्तै कैलाली, धनगढी उपमहानगरपालिका-१३ एकता टोलस्थित जंग बहादुर चौधरीको सुदूरपश्चिम कृषि तथा पशुपंक्षी फर्ममा विद्युत सर्ट भई मंगलबार राति आगलागी हुँदा करिब २ हजार ५ सय वटा बोईलर कुखुराको चल्ला, दाना, भुसा, चारो खुवाउने भाँडा पूर्णरूपमा जलेर करिब ६ लाख रूपैयाँ बराबरको धनमाल नष्ट भएको छ ।
यस्तै सप्तरी, सुरूङ्गा नगरपालिका-२ बाह्रबिघे बस्ने देबु सदाको घरमा मंगलबार दिउँसो आगलागी भई आगो फैलिएर सँगै रहेको कुखुरा फर्ममा समेत आगलागी हुँदा घर, घरमा रहेको सरसामान र कुखुरा फर्म समेत जलेर करिब ४ लाख ७ हजार रूपैयाँ बराबरको धनमाल नष्ट भएको छ ।
प्रहरीले स्थानीय बासिन्दा र दमकलको सहयोगमा आगलागी नियन्त्रणमा लिनुको साथै यस सम्बन्धमा आवश्यक अनुसन्धान गरिरहेको छ ।
प्रतिक्रिया राख्नुहोस्