प्रधानमन्त्री पुष्पकमल दाहाल ‘प्रचण्ड’ले आफू नेतृत्वको सरकारले एक वर्षको अवधिमा केही नयाँ मानक स्थापित गरेको दावी गर्दै अब दोस्रो वर्ष थप उपलब्धीमुलक बनाउने बताउनुभएको छ ।
सोमबार दिउँसो अर्घाखाँचीमा आयोजित कार्यक्रममा प्रधानमन्त्रीले प्रचण्डले आफ्नो तेस्रो कार्यकालको पहिलो एक वर्षका उपलब्धि टेकेर दोस्रो वर्षमा थप उपलब्धि हाँसिल गर्ने बताउनुभएको हो ।
नेपाल पत्रकार महासंघ अर्घाखाँचीद्वारा आयोजित “आर्थिक विकास, पर्यटन प्रवद्र्धन, स्थानीय रोजगारीका लागि अर्घाखाँची पर्यटन प्रवर्द्धन’’ कार्यक्रमको उद्घाटन गर्नुहुँदै प्रधानमन्त्रीले सो कुरा बताउनुभएको हो ।
सो क्रममा उहाँले भन्नुभयो, ‘‘तपाईहरूलाई थाहै छ– मैले तेस्रो पटक सरकारको नेतृत्व गरेको १ वर्षको अवधि पूरा भएको छ । जतिबेला मैले सरकारको नेतृत्व लिएको थिएँ, त्यतिबेला अर्थतन्त्र निकै चुनौतीपूर्ण अवस्थामा थियो, निर्वाचनबाट आएको त्रिअंकुश संसदले राजनीतिक स्थायित्व दिनेरनदिनेमा निकै ठूलो संशय थियो । तर एक वर्षको अनवरत प्रयासबाट देश र जनतासामु विद्यमान चुनौतीहरू सम्बोधन हुँदै गएका छन् ।’’
उहाँले भन्नुभयो, ‘‘यस अवधिमा अर्थतन्त्रमा महत्त्वपूर्ण सुधार आएको छ । विदेशी मुद्राको सञ्चितिमा इतिहासमै ठूलो प्रगति भएको छ । पर्यटन आगमनमा गुणात्मक वृद्धि भएको छ । बैंकको ब्याजदरमा कटौती, सहकारी र लघुवित्तका समस्याको सम्बोधन, भुक्तानी सन्तुलन, विप्रेषणमा वृद्धिका साथै शिथिल भएको उद्योग–व्यवसाय क्षेत्र क्रमशः चलायमान हुन थालेको छ । यो हाम्रा लागि खुसीको कुरा हो । तसर्थ उत्साही भएर काम गरौँ ।’’
उहाँले अर्घाखाँची जिल्लाको विकासमा सङ्घीय सरकारले प्राथमिकता दिने बताउँदै जिल्लाको विकासप्रति जिल्लाका राजनीतिक दलहरूमा देखिएको एकता र सहकार्यप्रति आभारसमेत प्रकट गर्नुभयो ।
नेपाली काँग्रेसकी नेता एवं प्रतिनिधि सभाकी पूर्व उपसभामुख पुष्पा भुसालले अर्घाखाँचीको सडक, शिक्षा स्वास्थ्य, कृषि र पर्यटनको विकासमा केन्द्रीय योजनाहरु हुनुपर्नेमा जोड दिनुभयो ।
प्रतिक्रिया राख्नुहोस्