सुगौली सन्धि अघिको नेपाल कायम हुनुपर्छ भन्दै अन्तर्राष्ट्रिय रुपमा अभियान चलाइरहेको ग्रेटर नेपाल राष्ट्रवादी मोर्चाले इन्डियाको ७४ औँ गणतन्त्र दिवसका अवसरमा त्यहाँका प्रधानमन्त्री नरेन्द्र दामोदरदास मोदीलाई ५ बुँदे ज्ञापनपत्र पठाएको छ ।
नेपालका प्रधानमन्त्रीका अतिरिक्त पाकिस्तान, बङ्गलादेश, श्रीलङ्का, भुटान, अफगानिस्तान, माल्दिभ्सका साथै सार्क सचिवालयलाई बोधार्थ दिइएको ज्ञापनपत्रमा गुञ्जीमाथि नेपालको सार्वभौम अधिकार कायम होस् भन्ने माग गरिएको छ ।
मोर्चाले ज्ञापनपत्रमार्फत् नेपालको सार्वभौमसत्ता सम्पन्न भूमि गुञ्जीलाई कब्जा गरी त्यो गाउँमा इन्डियाको भाइब्रेन्ट भिलेज प्रोजेक्ट सञ्चालन गर्नु हास्यास्पद र भयावह भएको समेत बताएको छ ।
नेपालको जमिन कब्जा गरी त्यहाँ सेना तैनाथ गरेर गणतन्त्र दिवस मनाउँदा नेपालीहरूले यसलाई साधारण रूपमा लिन्छन् भन्ने सोच्नु इन्डियाको भयानक भूल हो र यसलाई इन्डियाले जतिसक्दो चाँडो सच्याउनुपर्छ ।
क्षेत्रफलका हिसाबले सानो र सैनिक संख्या कम भएको भन्दैमा नेपालको भन्दा इन्डियाको सार्वभौमसत्तालाई ठूलो मान्न सकिँदैन र यो सार्वभौमसत्ताको अन्तर्राष्ट्रिय परिभाषा पनि नभएकाले ग्रेटर नेपाल राष्ट्रवादी मोर्चाको यो माग र नेपालीको आवाजलाई हलुका रूपमा नलिइयोस् भन्ने आग्रह समेत गरिएको छ ।
मोर्चाका अध्यक्ष फणीन्द्र नेपालले नेपालको अविभाज्य भूभाग गुञ्जीलाई भाइब्रेन्ट भिलेज बनाउने इन्डियाको केन्द्रीय सरकारको योजनाले नेपालको सार्वभौमसत्ता र भौगोलिक अखण्डतालाई खुला चुनौती दिएको विरोधमा इन्डियाका प्रधानमन्त्रीलाई ज्ञापनपत्र पठाएको बताउनुभएको छ ।
प्रतिक्रिया राख्नुहोस्