देशका विभिन्न स्थानमा आगलागीबाट विभिन्न धनमाल जलेर नष्ट भएको छ । पाल्पा, रामपुर नगरपालिका-१ हाँगेपिपलस्थित उचईगाउँ बस्ने हस्त बहादुर उचई र चुना कुमारी उचईको घर र गोठ तथा ज्ञान कुमारी उचईको घरमा शुक्रबार दिउँसो आगलागी हुँदा करिब ९ लाख ५२ हजार रूपैयाँ बराबरको धनमाल जलेर नष्ट भएको छ ।
त्यस्तै सर्लाही, बलरा नगरपालिका-४ बस्ने अख्तर हुसेनको घरमा शुक्रबार बिहान आगलागी हुँदा घर, लत्ताकपडा, अन्नपात लगायतका सामान जलेर करिब १२ लाख रूपैयाँ बराबरको धनमाल नष्ट भएको छ ।
यस्तै धनकुटा, चौबिसे गाउँपालिका-७ तल्लो गिद्दे बस्ने ३२ वर्षीय शेर बहादुर बिकको घरमा विद्युत सर्ट भई शनिबार बिहान आगलागी हुँदा घर तथा घरभित्र रहेको सम्पूर्ण सामान जलेर करिब ४ लाख रूपैयाँ बराबरको धनमाल नष्ट भएको छ । प्रहरीले स्थानीय बासिन्दाको सहयोगमा आगलागी नियन्त्रणमा लिनुको साथै यस सम्बन्धमा आवश्यक अनुसन्धान गरिरहेको छ ।
प्रतिक्रिया राख्नुहोस्