ओखलढुंगा, अछाम र सुर्खेतमा भएको छुट्टाछुट्टै सवारी दुर्घटनामा पाँच जनाको मृत्यु भएको छ । ओखलढुंगा, मानेभञ्ज्याङ गाउँपालिका-७ स्थित सडकमा खोटाङबाट काठमाडौंतर्फ जाँदै गरेको ना.१ ज ६४२१ नम्बरको सुमो गए राति दुर्घटना हुँदा सुमोमा सवार तीन जनाको मृत्यु भएको छ ।
दुर्घटनामा खोटाङ केपिलासगढी गाउँपालिका-३ बस्ने ५६ वर्षीया माया देवी गुरूङ, उनकै छोरा २८ वर्षीय पुजन गुरूङ र खोटाङ दिक्तेल रूपाकोट मझुवागढी नगरपालिका-१२ बस्ने ४५ वर्षीया तारा गुरूङको मृत्यु भएको हो । हाल फरार सुमो चालकको प्रहरीले खोजी गरिरहेको छ ।
त्यस्तै अछाम, कमलबजार नगरपालिका-१ मोटरकाट्या कमलबजार तुर्माखांदस्थित सडकमा कमलबजारबाट तुर्माखांदतर्फ जाँदै गरेको सु.प.प्र.०१००८ प ४०३ नम्बरको मोटरसाइकलको ठक्करबाट पैदलयात्री सोही नगरपालिका-१ मुली बस्ने ७२ वर्षीया मैसरा ढकालको बिहीबार दिउँसो घटनास्थलमै मृत्यु भएको छ । मोटरसाइकल चालकलाई प्रहरीले नियन्त्रणमा लिएको छ ।
यस्तै सुर्खेत, भेरीगंगा नगरपालिका-३ सतरीस्थित सडकमा ना.४ ख ६२६३ नम्बरको बस र क.प्र.०२००१ क ००४८ नम्बरको मिनी ट्रक एकआपसमा ठक्कर खाई बिहीबार दिउँसो दुर्घटना हुँदा ट्रक चालक दैलेख गुँरास गाउँपालिका-१ बस्ने ३१ वर्षीय हिरा पुन मगरको मृत्यु भएको छ ।
दुर्घटनामा गम्भीर घाइते भएका उनको कर्णाली प्रदेश अस्पताल कालागाउँमा उपचारको क्रममा मृत्यु भएको हो । साथै दुर्घटनामा घाइते भएका अन्य छ जनाको सोही अस्पतालमा उपचार भइरहेको छ । दुर्घटनाका सम्बन्धमा प्रहरीले आवश्यक अनुसन्धान गरिरहेको छ ।
प्रतिक्रिया राख्नुहोस्