राष्ट्रियसभाका अध्यक्ष नारायणप्रसाद दाहालले नागरिकलाई संसदीय प्रणालीका बारेमा सुसूचित गराउन, जनमत निर्माण गर्न तथा पारदर्शिता कायम राख्न राष्ट्रिय समाचार समिति (रासस) को समाचार सेवा प्रभावकारी भएको बताउनुभएको छ ।
राससको ६४औँ वार्षिकोत्सवको अवसरमा आज शुभकामना व्यक्त गर्दै उहाँले लोकतान्त्रिक समाज निर्माण, पारदर्शिता र सुशासन कायम गर्न तथा देशलाई आर्थिक समृद्धिको यात्रामा अघि बढाउन राससको भूमिका विशिष्ट रहँदै आएको उल्लेख गर्नुभएको छ ।
अध्यक्ष हादालले भन्नुभएको छ, “विसं २०१८ फागुन ७ गते सरकारी तहबाट स्थापना भएको राससले सरकार, राज्य, जनता र देशका दूरदराजका समाचार सङ्कलन गरी प्रवाह गर्दै आइरहेको छ, सञ्चार लोकतन्त्रको महत्वपूर्ण अङ्ग हो, जसले आमजनताको सूचनाको हकलाई सुनिश्चित गर्न योगदान पुर्याउँदै आएको छ ।”
नेपालमा भएका ठूलाठूला राजनीतिक आन्दोलनको समर्थन गर्दै परिवर्तनका निम्ति गरेका आन्दोलनमा राससले जनताको पक्षमा अहम भूमिका खेल्दै आएको उहाँको भनाइ छ ।
“सङ्घीय संसद्का दुवै सदन राष्ट्रियसभा र प्रतिनिधिसभाका गतिविधिहरू सम्प्रेषणमा राससको भूमिका निकै महत्वपूर्ण रहँदै आएको छ, सभा तथा समितिमा हुने कानुनी बहस, नीति निर्माण, विधेयकको छलफल, संसदीय निर्णय, सार्वजनिक सरोकारका विषयमा गरिने छलफल तथा सरकारको नीति तथा कार्यक्रमसम्बन्धी संवादलाई समाचारमार्फत आम जनतामाझ पु¥याउने काम राससले गरिरहेको छ”, उहाँले भन्नुभएको छ ।
विगत ६३ वर्षको यात्रामा राससले विभिन्न आरोहअवरोह पार गर्दै आफ्नो उत्तरदायित्व पूरा गरेको उल्लेख गर्दै उहाँले प्रविधिको तीव्र विकास र डिजिटल सञ्चार माध्यमको व्यापक विस्तारको वर्तमान परिवेशमा राससले आफूलाई नवीनतम प्रविधिसँग समायोजन गर्दै आफ्नो समाचार सेवा अझ प्रभावकारी रुपमा विस्तार गर्ने अपेक्षा उहाँको छ ।
प्रतिक्रिया राख्नुहोस्