नेपाली युवाहरूका लागि आकर्षक श्रम गन्तव्य बनिरहेको दक्षिण कोरिया स्थित एउटा बङ्गुर फार्ममा कार्यरत म्याग्दीका २८ वर्षीय तुलसी पुन मगरको आत्महत्यापछि त्यहाँ कार्यरतत नेपालीहरुको सुरक्षा चासो बढेको छ ।
दक्षिण कोरियाको छल्लानाम्दो मोक्पोस्थित वूसङ्ग पिग फार्ममा कार्यरत मगरलाई कोरियाली प्रहरीले गत शनिवार मृत अवस्थामा फेला पारेको थियो ।
मगरले आत्महत्या गर्नुको कारण अत्यधिक शारीरिक तथा मानसिक तनाव रहेको बताएका छन् । त्यहाँ कार्यरत अन्य नेपाली कामदारहरूले त्यस कम्पनीमा काम गर्दा अनेक तनाव झेल्नुपरेको र आफूहरूले सो कम्पनीको काममा निरन्तरता नसकिने बताएका छन् ।
त्यहाँ कार्यरत बाँकी नेपाली कामदारले काम गर्न नचाहेको बताएपछि सोलस्थित नेपाली राजदूतावासको पहलमा उनीहरूलाई अन्यत्र जान दिन रोजगारदाता कम्पनी सहमत भएको अधिकारीहरूले बताएका छन् ।
सो घटनापछि दूतावासले वस्तुस्थिति बुझ्न श्रम काउन्सिलर मैया कँडेलसहितको एउटा टोलीलाई उक्त कम्पनी पठाएको थियो जुन टोलीले त्यहाँ कार्यरत बाँकी नेपाली, कम्पनीका म्यानेजर र मालिक लगायतसँग जानकारी लिएको थियो ।
नेपाली राजदूत शिवमाया तुम्बाहाम्फे एकैचोटि सबै कामदारले छोड्दा बङ्गुर फार्म नै समस्यामा पर्ने भन्दै त्यसका साहु चरणबद्ध रूपमा नेपालीहरूलाई कम्पनी छोड्न दिन सहमत भएको बताउनुभयो ।
सहमति बमोजिम दुई साताभित्र नेपाली कामदारहरूले उक्त कम्पनी छोडिसक्ने भन्दै दूतावासले एक विज्ञप्तिमार्फत जानकारी दिएको छ । दूतावासले जनाएको छ।
राजदूत तुम्बाहाम्फेले त्यहाँ कार्यरत युवकको मृत्युको घटनापछि तीनजना रिलीज लेटर लिएर निस्किसकेको बताउँदै अब तीनजना महिलासहित १५ जनायुवक पालोपालो त्यहाँबाट निस्कने बताउनुभयो ।
प्रतिक्रिया राख्नुहोस्