नेपाली कांग्रेसका नेता शशाङ्क कोइरालाले नेपाल असङ्ख्य सम्भावना नै सम्भावनाको कुञ्ज भएकाले नेपाली युवाहरूले स्वदेशमा उद्यमशीलता गरेर बस्नुपर्ने सुझाव दिनुभएको छ ।
नेपाली कांग्रेस पूर्वआप्रवासी समन्वय विभागको गण्डकी प्रदेशस्तरीय भेलालाई शनिबार पोखरामा सम्बोधन गर्दै उहाँले नेपालको समृद्धिमा युवाले प्रमुख भूमिका निर्वाह गर्ने बताउनुभयो ।
“म सानो हुँदा बुबा बिपी कोइरालाले भन्नुहुन्थ्यो, ‘म धेरै राष्ट्र घुमेँ, तर संसारमा सबैभन्दा सुन्दर देश नेपाल लाग्यो, तिमी नेपालमा नै बस्नु ।’ पछि मलाई विदेश जाने अवसर मिल्यो, तलब पनि मनग्य थियो तर बुबाले भन्नुभएको कुराले बिजायो र विदेश पुगेर पनि स्वदेश नै फर्किएँ”, उहाँले भन्नुभयो ।
विदेशबाट फर्केका युवाले त्यहाँ सिकेका सीप र अनुभवलाई सदुपयोग गरी स्वरोजगारका अवसर सृजना गर्नुपर्नेमा नेता कोइरालाले जोड दिनुभयो । “मानिसको जीवन भनेको प्रयास र सङ्घर्षमय हुन्छ । निरन्तरको प्रयासले स्वदेशमा नै अवसर सृजना गर्न सकिन्छ”, उहाँले भन्नुभयो ।
कतिपय मानिसले असफलताबाट सफलता हासिल गरेका उदाहरणहरू समाजमा रहेका भन्दै उहाँले आफूले गरेका काममा असफलतातर्फ गए पनि निरन्तरको प्रयासपछि सफलता मिल्ने धारणा राख्नुभयो ।
नेपाली कांग्रेसका केन्द्रीय सदस्य अर्जुन जोशीले रोजगारीका लागि विदेश गएर स्वदेश फर्किएका युवाहरूले विदेशमा आर्जन गरेको सीपबाट उद्यमशीलता गरेर आफ्नो मुलुकलाई समृद्ध बनाउने अभियानमा सहकार्य गर्नुपर्नेमा जोड दिनुभयो ।
केन्द्रीय सदस्य गुरु बरालले केही बाध्यता र केही रहरले विदेश गएका युवाहरू स्वदेशमा फर्केपछि मुलुकमा अवसर खोजिरहेकाले सबै यस्ता उदाहरण बन्न सक्नुपर्ने धारणा राख्नुभयो ।
नेपाली कांग्रेस पूर्वआप्रवासी समन्वय विभाग गण्डकी प्रदेशका अध्यक्ष कृष्ण लम्सालको अध्यक्षता उक्त कार्यक्रम सम्पन्न भएको थियो ।
प्रतिक्रिया राख्नुहोस्