पूर्व प्रधानमन्त्री डा. बाबुराम भट्टराईले प्रधानमन्त्री पुष्पकमल दाहाल प्रचण्डलाई अनुहारमा लागेको धुलो ऐना पुछेर नहट्ने भन्दै पहिला आफ्नो अनुहारको धुलो पुछ्न आव्हान गर्नुभएको छ ।
प्रधानमन्त्री प्रचण्डले काम गर्न नसकेको भन्दै पुरानो गठबन्धन भत्काएर नयाँ गठबन्धन सहितको सरकार बनाएपछि डा. भट्टराईले अरुलाई दोष दिनुभन्दा पहिला आफ्ना गतिविधि र नीति तथा कार्यक्रम हेर्न आग्रह गर्दै सो कुरा बताउनुभएको हो ।
सामाजिक सञ्जालमा सटिक टिप्पणी गर्दै डा. भट्टराईले “विविध कारण देखाउँदै राम्रो परिणाम आएन भनेर पटकपटक गठबन्धन र मन्त्रीहरू फेरिरहे पनि आफ्नो आधारभूत सोंच, नीतिकार्यक्रम, प्राथमिकता र कार्यशैलीमा पो त्रुटी छ कि भन्नेतिर पटक्कै ध्यान नदिएको” भन्दै अनुहार हेर्न सुझाव दिनुभएको हो ।
गालीबको चर्चित कवितांश “धूल चेहरे पर थी और मैं आइना साफ करता रहा” कवितांश साभार गर्दै उहाँले प्रधानमन्त्री प्रचण्डलाई कार्यशैली फेर्न अनुरोध गर्दै उहाँले भन्नुभएको छ-
“उल्टै गर्वसाथ घोषणा गर्नुहुन्छ- म बाॅचुन्जेल देशमा उथलपुथल भइरहन्छ रे! अग्रगामी कि पश्चगामी उथलपुथल? परिणामविहीन अस्थीरता र त्यसले ल्याउने आर्थिक संकट, युवा पलायन, बाहिरी चलखेल आदि गर्व गर्नलायक कुरा हो?
जनयुद्धका सर्वोच्च कमाण्डरले पटपटक प्रम हुॅदा शान्तिप्रकृया पूरा गर्ने कुरालाई पहिलो प्राथमिकतामा राख्नुपर्दैन ? शान्तिप्रक्रियाका प्रमुख हिस्सेदार कांग्रेस र एमाले र तीसंग जोडिएका शक्तिकेन्द्रहरू सबैलाई साथ लिएर शान्तिप्रक्रिया टुंगिन्छ कि आफ्नो कुर्सीकाल लम्ब्याउन कहिले कोसंग कहिले कोसंग टाॅसिने र अर्कोलाई धोका दिने तरिकाले टुंगिन्छ?
संवेदनशील भूराजनीतिक द्वन्द बढ्दै गैरहेको वेला मूलतः तीन प्रमुख बाह्य शक्तिवीच सन्तुलन मिलाउनु सट्टा आफ्नो लहड वा निजी स्वार्थमा कहिले कोसंग कहिले अर्कोसंग टाॅसिने र अर्कोलाई चिढ्याउने तरिकाले देशको सार्वभौमिकता/स्वाधीनताको रक्षा हुन्छ कि खतरामा पर्छ ? लाटो खान्छ एक बल्ड्यांग, बाठो खान्छ दश बल्ड्यांग नहोस् !
प्रतिक्रिया राख्नुहोस्