देशका विभिन्न स्थानमा भएको आगलागीबाट विभिन्न धनमाल जलेर नष्ट भएको छ । धनकुटा, चौबिसे गाउँपालिका-४ बास्थलास्थित भागे छरुवा खोला जंगलमा बुधबार साँझ लागेको आगो फैलिएर सोही ठाउँ बस्ने ३२ वर्षीय सुरेश खड्काको कच्ची घर, भान्सा घर र ३ वटा गोठमा समेत आगलागी हुँदा करिब ६ लाख रूपैयाँ बराबरको धनमाल जलेर नष्ट भएको छ ।
त्यस्तै सिन्धुली, मरिण गाउँपालिका-५ चौकीटौरी बस्ने ५९ वर्षीय बुद्धिमान पाख्रिनको घरमा विद्युत सर्ट भई बुधबार राति आगलागी हुँदा घर पूर्णरूपमा जलेर करिब ५ लाख रूपैयाँ बराबरको धनमाल नष्ट भएको छ । साथै आगो निभाउने क्रममा घाइते भएका बुद्धिमानको छोरा २९ वर्षीय रेशम पाख्रिनको प्राथमिक स्वास्थ्य केन्द्र कपिलाकोटमा उपचार भइरहेको छ ।
यस्तै ओखलढुंगा, चिशंखुगढी गाउँपालिका-१ कुईभीर केराबारीस्थित जंगलमा बुधबार दिउँसो लागेको आगो फैलिएर सोही बस्ने आश बहादुर राईको घरमा समेत आगलागी हुँदा घर पूर्णरूपमा जलेर करिब १० लाख रूपैयाँ बराबरको धनमाल नष्ट भएको छ । उता मकवानपुर, मनहरी गाउँपालिका-९ चौधमाईलस्थित सडकमा चितवनबाट हेटौंडातर्फ जाँदै गरेको ना.६ ख ६१८ नम्बरको ट्रकमा विद्युत सर्ट भई बुधबार बेलुकी आगलागी हुँदा ट्रक पूर्णरूपमा जलेर करिब २५ लाख रूपैयाँ बराबरको धनमाल नष्ट भएको छ ।
यता पाँचथर, हिलिहाङ गाउँपालिका-४ सालिङ्गेस्थित तिलबारी वनमा बुधबार दिउँसो लागेको आगो फैलिएर सोही ठाउँ बस्ने गंगा योङयाको घरमा समेत आगलागी हुँदा घर पूर्णरूपमा जलेर करिब ३ लाख रूपैयाँ बराबरको धनमाल नष्ट भएको छ । यसैगरी लमजुङ, मर्स्याङ्दी गाउँपालिका-५ तल्लो चिप्ला बस्ने तुल्सी घलेको घरमा विद्युत सर्ट भई बुधबार दिउँसो आगलागी हुँदा घर पूर्णरूपमा जलेर नष्ट भएको छ । क्षतिको विवरण हाल खुलेको छैन् ।
त्यसैगरी हुम्ला, अदालचुली गाउँपालिका-५ काठेस्थित खौला भन्ने स्थान बस्ने ४५ वर्षीय माने टमटाको घरमा बुधबार राति आगलागी हुँदा घर पूर्णरूपमा जलेर नष्ट भएको छ । क्षतिको विवरण हाल खुलेको छैन् । त्यस्तै कपिलवस्तु, कृष्णनगर नगरपालिका-७ सुख्रामपुर बस्ने कल्लु कहारको कच्ची घरगोठमा बुधबार राति आगलागी भई सोही ठाउँ बस्ने अनी कहारको घरगोठ र दयाशंकर चौधरी घरमा समेत फैलिएर आगलागी हुँदा करिब ३ लाख ७० हजार रूपैयाँ बराबरको धनमाल जलेर नष्ट भएको छ ।
यस्तै सुनसरी, बराहक्षेत्र नगरपालिका-११ मधुवन खान टोल बस्ने ६० वर्षीय मुर्तुजा खानको गुवालीमा बुधबार राति आगलागी भई सोही ठाउँ बस्ने ३५ वर्षीय मियरूदिन खानको घर तथा गुवालीमा समेत फैलिएर आगलागी हुँदा करिब ३ लाख ५० हजार रूपैयाँ बराबरको धनमाल जलेर नष्ट भएको छ । प्रहरीले स्थानीय बासिन्दा तथा दमकलको सहयोगमा आगलागी नियन्त्रणमा लिनुका साथै यस सम्बन्धमा थप अनुसन्धान गरिरहेको छ ।
प्रतिक्रिया राख्नुहोस्