फागुन ७ गते प्रजातन्त्र दिवसका अवसरमा पूर्वराजाको सन्देशले अहिले देशको राजनीतिमा हलचल ल्याएको छ । राजालाई सडकबाटै गद्दीमा राख्नेसम्मका हुँकार भैरहँदा दलका नेताहरु त्यो असम्भव रहेको बताइरहेका छन् ।
यसै क्रममा गृहमन्त्री रमेश लेखकले शनिबार गणतन्त्रको विकल्प राजतन्त्र र लोकतन्त्रको विकल्प कुनै निरंकुशता हुन नसक्ने बताउनुभयो ।
भूकम्पीय पुनर्निर्माण तथा पुनःस्थापना आयोजना कार्यान्वयन एकाइ कार्यालयको उद्घाटन गर्न अछाम जाने क्रममा नेपाल प्रेस युनियनले आयोजना गरेको पत्रकार सम्मेलनमा उहाँले भन्नुभयो, “गणतन्त्रको विकल्प राजतन्त्र हुन सक्दैन, लोकतन्त्रको विकल्प कुनै निरंकुशता हुन सक्दैन ।”
लोकतन्त्रका विरुद्धमा अहिले भइरहेका गतिविधि गर्न लोकतन्त्रले नै छुट दिएको उहाँले बताउनुभयो । उहाँले पूर्वराजालाई शासन गर्न मन भए चुनावमा होमिएर खुला राजनीति गर्न चुनौतीसमेत दिनुभयो ।
गृहमन्त्री लेखकले संविधान संशोधनका विषयमा गृहकार्य भइरहेको बताउनुभयो । सरकार गठन पूर्वनेपाली कांग्रेस र नेकपा (एमाले) बीच भएको समझदारीअनुसार संविधान संशोधनका लागि कार्यदल बनाउने सहमति भई गृहकार्य अघि बढेको र सबैको सहमतिमा संविधान संशोधन हुने उहाँले बताउनुभयो ।
प्रतिक्रिया राख्नुहोस्