इशान पाण्डेको अलराउन्ड प्रदर्शनमा बागमती प्रदेशले प्रधानमन्त्री कप राष्ट्रिय पुरुष एकदिवसीय क्रिकेट प्रतियोगितामा दोस्रो जित हासिल गरेको छ । मंगलबार भएको खेलमा गण्डकी प्रदेशमाथि ६९ रनको जित निकाल्दै बागमतीले प्रतियोगितामा दोस्रो जित हासिल गरेको हो ।
सिद्धार्थ क्रिकेट मैदानमा भएको खेलमा टस हारेर पहिले ब्याटिङ गरेको बागमतीले निर्धारित ५० ओभरमा आठ विकेट गुमाउँदै दुई सय ८८ रन बनाएको थियो । बागमतीका लागि इशान पाण्डेले ८२ बलमा ६ चौकाको मद्दतमा ६९ रनको अर्धशतकीय पारी खेले भने विपिन आचार्यले ४२ बलमा सात चौका र दुई छक्काको सहयोगमा अविजित रहँदै ६३ रनको अर्धशतकीय इनिङ खेले ।
त्यस्तै शुभ कंसाकारले ५१ बलमा ९ चौकाको प्रहार गर्दै ५२ रन जोड्दा विवेक मगरले ३४ रन बनाए । यस्तै रिजन ढकाल २३ रनमा अविजित रहँदा कप्तान पृथु बास्कोटाले १६ र आशुतोष घिरैयाले १४ रन बनाए । गण्डकीका लागि अर्जुन कुमालले चार विकेट लिए भने विपिन खत्री र सुवास भण्डारीको भागमा समान दुई-दुई विकेट रह्यो ।
बागमतीले प्रस्तुत गरेको दुई सय ८९ रनको लक्ष्य लिएर मैदान उत्रेको गण्डकी ४४ ओभरमा दुई सय १९ रनमा अलआउट भयो । गण्डकीका लागि वंश क्षेत्रीले ९० बलमा चार चौकाको मद्दतले ५५ रनको अर्धशतकीय पारी खेले पनि टोलीलाई जित दिलाउन सकेनन् । यसैगरी समीर कँडेलले २६ रन जोड्दा अमृत गुरुङले २०, दीपक डुम्रे र कमल परियारले समान -१९-१९ रन बनाए ।
यस्तै सुवास भण्डारी १८ रनमा अविजित रहँदा अर्जुन कुमालले १४, दिनेश बुढामगरले ११ र सुजन गौतमले १० रन जोडे । बागमतीका लागि इशान पाण्डेले चार विकेट लिए भने साकार गजुरेलले दुई विकेट लिंदा रिजन ढकाल, सूर्य तामाङ र गौतम केसीको भागमा समान एक-एक विकेट रह्यो ।
जितसँगै बागमती पाँच खेलमा चार अंक जोड्दै तालिकाको छैटौं स्थानमा उक्लिएको छ समान खेलबाट दुई अंक जोडेको गण्डकी आठौं स्थानमा रहेको छ ।
प्रतिक्रिया राख्नुहोस्