सांसदहरुले तातोपानी भन्सारबाट काठमाडौँ आउँदै गरेको गाडीमा अवैध भेप (विद्युतीय चुरोट) ल्याउने कार्यमा संलग्नलाई कानुनी कारबाही गर्न माग गरेका छन् ।
प्रतिनिधिसभाको बिहिबारको बैठकमा राष्ट्रिय स्वतन्त्र पार्टीका सांसद मनिष झाले अवैध भेप बोकेर आएको गाडी भाटभटेनी सुपर मार्केटको रहेकाले कारबाही नभएको आरोप लगाउनुभयो ।
उहाँले भन्नुभयो, तातोपानी भन्सार नाकाबाट काठमाडौँ आउँदै गरेको ट्रकमा फेला परेको भेप एमालेको पार्टी कार्यालय बनाउन जग्गादान गर्ने दाताको ट्रक भएकाले कारबाही नभएको हो भन्दै सरकारमाथि प्रश्न उठाउनुभयो ।
सांसद झाले २५ करोड रकम बराबरको अवैध भेप ल्याउने मालिक पत्ता लगाउन सरकारसँग माग गर्दै भरिया समातेर कालाबजारिया संरक्षण नगर्न ध्यानाकर्षण गराउनुभयो ।
यसअघिका यस्तै घटनामा भरिया समातिए पनि अवैध सामान ल्याउने मालिकलाई उन्मुक्ति दिएको भन्दै उहाँले आपत्ति जनाउनुभयो । बाह्रबिसेमा समातिएको अवैध भेप भित्र्याउनेलाई कारबाही गर्न सांसद झाले माग गर्नुभयो ।
त्यस्तै सांसद गङ्गा कार्कीले बाह्रबिसेस्थित खोर्सानीबारीको अस्थायी प्रहरी चौकीले नियन्त्रणमा लिएको ना६ख ५४९६ नम्बरको ट्रक भाटभटेनी सुपरमार्केटका साहु मीनबहादुर गुरुङको भएको जानकारीमा आएकाले निजलाई कानुनी कारबाही गर्न माग गर्नुभयो ।
प्रतिक्रिया राख्नुहोस्