इन्डोनेसियाका प्रबोवो सुबियान्तो विश्वको तेस्रो सबैभन्दा ठूलो लोकतन्त्रको राष्ट्रपतिमा निर्वाचित हुनुभएको निर्वाचन आयोगले बुधबार बताएको छ । मतदानका बारेमा कानूनी उजुरी गर्ने वाचा गरेका दुई प्रतिद्वन्द्वीलाई उहाँले निर्णायकरूपमा हराउनुभएको छ ।
रक्षामन्त्री प्रबोवो र उहाँका उपराष्ट्रपतिका उम्मेदवार जिब्रान राकाबुमिङ राकालाई नौ करोड ६० लाखभन्दा बढी मत प्राप्त भएको निर्वाचन आयोगका अध्यक्ष हसिम अस्यारीले जानकारी दिनुभयो । उक्त मत कूल गणनाको ५८ दशमलव छ प्रतिशत हो र पहिलो चरणमा बहुमत हासिल गर्नका लागि पर्याप्त हो ।
एनिस बास्वेदनले करिब चार करोड १० लाख मत अर्थात कूल गणनाको २४ दशमलव नौ प्रतिशत प्राप्त गर्नुभयो भने गञ्जर प्रणोवोलाई १६ प्रतिशत अर्थात दुई करोड ७० लाख मत प्राप्त भयो ।
प्रबोवो र जिब्रान (निवर्तमान राष्ट्रपति जोको विडोडोका जेठा छोरा) ले अनौपचारिक गणनामा बहुमत हासिल गरेको देखिएपछि गत महिना पहिला नै जीतको घोषणा गर्नुभएको थियो ।
तेस्रो प्रयासमा ७२ वर्षीय प्रबोवोले राष्ट्रपति पदमा विजयी हुने भविष्यवाणी गरिएको थियो । उहाँले अक्टोबरमा राष्ट्रपतिको जिम्मेबारी सम्हाल्नुहुनेछ । आफ्नो लोकप्रिया भाषणमा राष्ट्रवादी भावना, रक्षामन्त्रीका रूपमा बलियो साख र जोकोवीको नामले लोकप्रिय विडोडोको समर्थनका कारण प्रबोवोको लोकप्रियता बढेको विशेषज्ञहरूले बताएका छन् ।
उहाँका प्रतिद्वन्द्वीहरू एनिस र गञ्जरले निर्वाचनका क्रममा अनियमितता र धाँधलीको आरोपका बारेमा संवैधानिक अदालतमा उजुरी गर्ने वाचा गर्नुभएको छ । यद्यपि आफ्नो बहुमत र फराकिलो मतान्तरको जितका कारण चुनावी नतिजालाई सफलतापूर्वक चुनौती दिइने छैन भन्नेमा प्रबोवोको टिम विश्वस्त रहेको स्थानीय मिडियाले मङ्गलबार बताएका छन् ।
प्रतिक्रिया राख्नुहोस्