बसिर अहमदको अर्धशतकीय पारीमा प्रधानमन्त्री कप राष्ट्रिय पुरुष एकदिवसीय क्रिकेट प्रतियोगितामा विभागीय टोली त्रिभुवन आर्मी क्लबले सानदार जित हासिल गरेको छ । आइतबार भएको खेलमा लुम्बिनी प्रदेशमाथि १३१ रनको सानदार जित निकाल्दै आर्मीले प्रतियोगितामा सातौं जित निकालेको हो ।
सिद्दार्थनगर क्रिकेट मैदानमा भएको खेलमा टस जितेर पहिले ब्याटिङ गरेको आर्मीले ४९.२ ओभरमा दुई सय ४३ रन बनाएको थियो । आर्मीका लागि बसिर अहमदले १०४ बलमा छ चौकाको मद्दतमा ८६ रनको अर्धशतकीय पारी खेले भने भीम सार्कीले ४४ रन बनाए ।
त्यस्तै तृतराज दासले ३१ रन जोड्दा सोमपाल कामीले २८, कुशल मल्लले १७ र इम्रान खानले १२ रन बनाए । लुम्बिनीका लागि अजय चौहानले चार विकेट लिए भने कृष्ण कार्की, निर्मल गुरुङ, रमेश कुर्मी, नर सार्की र देव खनालको भागमा समान एक-एक विकेट रह्यो । आर्मीले प्रस्तुत गरेको दुई सय ४४ रनको लक्ष्य लिएर मैदान उत्रेको लुम्बिनी २७.१ ओभरमा एक सय १२ रनमै अल आउट भयो ।
लुम्बिनीका लागि कप्तान देव खनालले ३७ रन बनाए भनर मनीष थापा र विप्रसन केसीले समान १३-१३ रन जोडे । यस्तै नर सार्कीले १२ र निर्मल गुरुङले १० रन बनाउनु बाहेक अन्य खेलाडीले दोहोरो अंकमा रन जोड्न सकेनन् । आर्मीका लागि शाहब आलामले चार विकेट लिए भने नरेन साउदले दुई विकेट लिंदा सोमपाल कामी, आकाश चन्द र बसिर अहमदको भागमा समान एक-एक विकेट रह्यो ।
जितसँगै आर्मी आठ खेलमा १४ अंक जोड्दै तालिकाको दोस्रो स्थानमा छ भने समान खेलबाट दुई अंक जोडेको लुम्बिने पाँचौं स्थानमा रहेको छ ।
प्रतिक्रिया राख्नुहोस्