“नियुक्त हुनेवित्तिकै कुलमानले बिजुली बोकेर ल्याएको हो र उज्यालो नायक मान्नु ?” : प्रधानमन्त्री ओली

प्रधानमन्त्री केपी शर्मा ओलीले नेपाल विद्युत् प्राधिकरणका कार्यकारी निर्देशक कुलमान घिसिङलाई हटाउनु सामान्य भए पनि तीललाई पहाड बनाउने काम भएको भन्दै आपत्ति जनाउनुभएको छ ।

मंगलबार प्रधानमन्त्रीनिवास बालुवाटारमा कांग्रेस नेतृ सुजता कोइरालाद्वारा लिखित पुस्तक ‘म र मेरो सानोबुबा’ नामक आत्मकथाको लोकार्पण समारोहलाई बोल्ने क्रममा प्रधानमन्त्री ओलीले सो टिप्पणी गर्नुभएको हो ।

सोमबार बसेको मन्त्रिपरिषद् बैठकले घिसिङलाई कार्यकारी निर्देशक पदबाट बर्खास्त गर्ने निर्णय गरेपछि आक्रोश पोख्दै सञ्जालदेखि सडकसम्म विरोध सुरु भएको छ ।

प्रधानमन्त्री ओलीले भन्नभयो, पहिला–पहिला तिलका पहाड बनायो भन्थे । तिललाई नै पहाड बनाउने चलन छ । त्यसैलाई समातेर खुब हल्लाखल्ला गर्ने चलन छ । अहिले पनि केही सानो एउटा त्यान्द्रो विषय पाएका जस्तो लाग्यो केही मानिसलाई उफ्रिरहेका छन्, कुदिरहेका छन् ।

कुलमानप्रति आम नागरिकमाा बसेको छाप गलत भएको भन्दै प्रधानमन्त्री ओलीले कुलमान नियुक्त हुनेवित्तिकै जादु, चमत्कार नभएको भन्दै यस्ता कुराको भ्रममा नपर्न आग्रह समेत गर्नुभयो ।

उहाँले भन्नुभयो, “उहाँ (कुलमान) ले उज्यालो ल्याउनुभयो भनेर व्याख्या गर्नुभएछ । अघिल्लो ४ वर्षको कार्यकाल पूरै त्यहीँ काम गर्नुभएको हो ? त्यसबेला ल्याउनुभएको थियो की उहाँ (प्रचण्ड) ले नियुक्त गर्नेबित्तिकै आगो बोकेर आउनुभयो, बिजुली, चिम, ट्रान्समिसन लाइन बोकेर आउनुभयो की ? वर्षौं लगाएर जे काम गरिएको हुन्छ, त्यसलाई जादु, चमत्कारको रुपमा व्याख्या गर्ने । कोही पनि साथीहरूलाई यस्ता कुराको भ्रममा नपर्न आग्रह गर्न चाहन्छु ।”