चैत्र १५ गते काठमाडौंको तीनकुनेमा भएको घटनामा पक्राउ पर्नुभएका राष्ट्रिय प्रजातन्त्र पार्टीका वरिष्ठ उपाध्यक्ष रवीन्द्र मिश्र तथा महामन्त्री तथा सांसद धवलशमशेर जबरालाई राज्यविरुद्धको अपराधको मुद्दा लगाइएको छ ।
तीनकुने घटनामाथि अनुसन्धान गरिरहेको प्रहरीले मिश्र, सांसद जबरा लगायत ११ जनालाई राज्यविरुद्धको अपराधको आरोपमा थुनामा राख्ने अनुमतिका लागि जिल्ला अदालतमा पेस गरेको छ ।
जिल्ला सरकारी वकिलको कार्यालय काठमाडौंका प्रमुख रामहरि शर्मा काफ्लेका अनुसार, उहाँहरूमाथि प्रारम्भिक अनुसन्धानपछि राज्यविरुद्धको कसुर आकर्षित हुने देखिएकाले त्यसमा म्याद थप गर्ने तयारी भइरहेको छ ।
सोही सन्दर्भमा पक्राउ पर्नुभएका राजसंस्था पुनस्थापनाका लागि संयुक्त जनआन्दोलन समितिका प्रवक्ता स्वागत नेपाललाई भने हाजिरी जमानीमा छाडिएको छ ।
यसै गरी पक्राउ परेका अरु ३१ जनालाई आपराधिक उपद्रव र संगठीत अपराधको अभियोगमा म्याद थप्न अदालतमा पेश गरिएको छ ।
जिल्ला प्रहरी परिसर, काठमाडौंका प्रमुख अपिलराज बोहराले घटनामा संलग्नहरूका बारेमा सरोकारवालाहरूसँग जाहेरी र अरु सूचनाका लागि सार्वजनिक आह्वान भएको जानकारी दिनुभएको छ ।
प्रतिक्रिया राख्नुहोस्