सन् २०२० देखि विश्वभर फैलिएको कोभिड १९ सङ्क्रमणले पारेको आर्थिक, सामाजिक असर अहिलेसम्म कायम छ । विश्व अर्थतन्त्र अझै प्रभावकारी रुपमा अघि बढ्न सकेको छैन ।
कोभिड १९ पछि विभिन्न मुलुकहरुमा अरु सङ्क्रामक रोगहरु फैलिए । विश्वले सोच्दै नसोचेको र पूर्व तयारीमा नरहेको कोभिड १९ पछि भने यस्ता स्वास्थ्य सङ्कटको तयारीका लागि नयाँ पहल सुरु भएको छ ।
यसमा जापान अग्रस्थानमा देखिएको छ । जापानले भविष्यका सङ्क्रमण रोग सङ्कटहरूको तयारीको लागि नयाँ अनुसन्धान संस्था ‘जापान स्वास्थ्य सुरक्षा संस्था’ (जेआईएचएस) स्थापना गरेको छ ।
यो संस्था मङ्गलबार देखि सुरु गरिएको हो । यसलाई राष्ट्रिय सङ्क्रमण रोग संस्थान, राष्ट्रिय ग्लोबल स्वास्थ्य र चिकित्सा केन्द्रलाई मिलाएर निर्माण गरिएको हो । यसका मुख्य उद्देश्यहरू सङ्क्रमण रोगको सूचना विश्लेषण, अनुसन्धान र सङ्कटको प्रतिक्रिया प्रदान गर्नु हो ।
संस्थाले सङ्क्रमण रोगको जोखिम मूल्याङ्कन तथा सूचना सङ्कलन गर्ने र वैज्ञानिक तथ्यहरूको रिपोर्ट सरकारलाई दिनेछ । महामारीको स्थिति आएमा, सरकारसँग मिलेर औषधी तथा खोपको विकास गर्ने र उपचारका लागि मार्गनिर्देश तयार गर्ने काम गर्नेछ ।
प्रतिक्रिया राख्नुहोस्