इन्डियन प्रिमियर लिग (आइपिएल) क्रिकेट प्रतियोगितामा दिल्ली क्यापिटल्सले लगातार तेस्रो खेलमा जित हासिल गरेको छ । शनिबार भएको खेलमा चेन्नइ सुपर किंग्सलाई २५ रनले पराजित गर्दै दिल्लीले प्रतियोगितामा लगातार तेस्रो जित हासिल गरेको हो ।
जारी प्रतियोगितामा चेन्नईको भन्ने यो चौंथो खेलमा लगातार तेस्रो हार हो । चेन्नइको घरेलु मैदान एमए चिदम्बरम स्टेडियम, चेपौकमा भएको खेलमा टस जितेर पहिले ब्याटिङ गरेको दिल्लीले निर्धारित २० ओभरमा ६ विकेट गुमाएर १ सय ८३ रन बनाएको थियो । दिल्लीको लागि केएल राहुलको ७७ रनको अर्धशतकीय पारी खेले भने अभिषेक पोरेलले ३३ रन बनाए ।
त्यस्तै कप्तान अक्षर पटेलले २१ रन जोड्दा समिर रिजभीले २० र ट्रिस्टन स्टब्सले २४ रनमा अविजित रहे रहे । चेन्नईको लागि खलील अहमदले दुई विकेट लिए भने मथिशा पाथिराना, नूर अहमद र रविन्द्र जडेजाको भागमा समान एक-एक विकेट रह्यो । दिल्लीले प्रस्तुत गरेको १ सय ८४ रनको लक्ष्य लिएर मैदान उत्रेको चेन्नई निर्धारित २० ओभरमा ५ विकेट गुमाएर १ सय ५८ रन मात्र बनाउन सक्यो ।
चेन्नइका लागि विजय शंकरले अविजित रहँदै ६९ रनको अर्धशतकीय पारी खेले पनि टोलीलाई जित दिलाउन सकेनन् । यस्तै महेन्द्र सिंह धोनी ३० रनमा अविजित रहँदा शिवम दुवेले १८ र डेभन कन्वेले १३ रन बनाए । दिल्लीको लागि विप्रज निगमले दुई विकेट लिए भने मिचेल स्टार्क, कुलदीप यादव र मुकेश कुमारको भागमा समान एक-एक विकेट रह्यो ।
जितसँगै दिल्ली ३ खेलमा ६ अंक जोड्दै अङ्क तालिकाको शीर्ष स्थानमा उक्लिएको छ भने ४ खेलमा २ अंक जोडेको चेन्नइ आठौं स्थानमा रहेको छ ।
प्रतिक्रिया राख्नुहोस्