शिक्षक आन्दोलन चौथो चरणमा : माग पूरा नभएसम्म उत्तरपुस्तिका परीक्षण नगर्ने

शिक्षा ऐन जारी हुनुपर्ने माग राखी तीन वर्षदेखि पटकपटक आन्दोलन गर्दै आएका शिक्षकहरु अब निर्णायक आन्दोलनमा होमिएका छन् । एसइईको उत्तरपुस्तिका समेत परीक्षण नगर्ने उनीहरुको अडान छ ।

यसअघि पटकपटक सरकारसंग सहमति गरी आन्दोलन स्थगित गरेका शिक्षकहरु यसपटक माग पूरा नभएसम्म सरकारसंग वार्ता नै नगर्ने अडानमा रहँदै आज सोमबारदेखि चौथो चरणको आन्दोलन घोषणा गरेका छन् ।

चैत २० गतेदेखि काठमाडौँमा सडक आन्दोनल गरिरहेको नेपाल शिक्षक महासङ्घले चैत्र २५ गते सोमबारदेखि चौथो चरणको आन्दोलन घोषणा गरेको हो ।

महासंघले आन्दोलन अवधिभरि उत्तरपुस्तिका परीक्षण, नतिजा प्रकाशन, तालिम गोष्ठी, शैक्षिक भ्रमणजस्ता कुनै पनि कार्यमा सङ्लग्न नहुन शिक्षकहरुलाई आग्रह गरिएको महासंघका अध्यक्ष लक्ष्मीकिशोर सुवेदीले जानकारी दिनुभयो ।

विगतमा भएका सहमतिअनुसार विधेयक जारी गर्नुपर्ने र सो माग पूरा नभएसम्म आन्दोलनमै रहने महासंघका अध्यक्ष सुवेदीले बताउनुभयो ।

उहाँले अध्यादेशबाट भए पनि विगतमा गरिएका सहमतिअनुसार विधेयक जारी गर्नुपर्ने माग गरे । शिक्षकहरुले विद्यालय शिक्षा ऐन जारी गर्न माग गर्दै आइतबार सिट्ठी बजाएर प्रदर्शन गरेका थिए ।