इन्डियन प्रिमियर लिग (आइपिएल) मा लखनउ सुपर जायन्ट्सले रोमाञ्चक जित निकालेको छ । मंगलबार भएको पहिलो खेलमा लखनउले कोलकाता नाइट राइडर्समाथि चार रनको रोमाञ्चक जित निकालेको हो ।
कोलकाताको घरेलु मैदान इडन गार्डेनमा भएको खेलमा टस हारेर पहिले ब्याटिङ गरेको लखनउले निर्धारित २० ओभरमा ३ विकेट गुमाएर २ सय ३८ रन बनाएको थियो । उसका लागि निकोलस पुरनले ३६ बलमा ७ चौका र ८ छक्काको सहयोगमा अविजित रहँदै ८७ रनको अर्धशतकीय पारी खेले भने मिचेल मार्शले ४८ बलमा ६ चौका र पाँच छक्कासहित ८१ रनको अर्धशतकीय इनिङ खेले । त्यस्तै एडियन मार्करमले ४७ रन बनाए । कोलकाताका लागि हर्षीत रानाले दुई विकेट लिए भने आन्द्रे रसेलको भागमा एक विकेट रह्यो ।
लखनउले प्रस्तुत गरेको २ सय ३९ रनको लक्ष्य लिएर मैदान उत्रेको कोलकाताले निर्धारित २० ओभरमा ७ विकेट गुमाएर २ सय ३४ रनमात्र बनायो । कोलकाताका लागि कप्तान अजिंक्य रहाणेले ३५ बलमा आठ चौका र दुई छक्काको मद्दतले सर्वाधिक ६१ रनको अर्धशतकीय पारी खेले पनि टोलीलाई जित दिलाउन सकेनन् ।
यस्तै वेङ्कटेस अय्यरले ४५ रन जोड्दा रिंकु सिंहले अविजित ३८, सुनिल नारिनले ३०, क्विनटन डी ककले १५ र हर्षीत रानाले अविजित रहँदै १० रन बनाए । लखनउका लागि आकाशदीप सिंह र शार्दुल ठाकुरले समान दुई-दुई विकेट लिए भने आवेश खान, दग्विेश राठी र रवि विश्नोईको भागमा समान एक-एक विकेट रह्यो ।
जितसंगै लखनउ पाँच खेलमा छ अंक जोड्दै चौंथो स्थानमा छ भने समान खेलबाट चार अंक जोडेको कोलकाता छैटौं स्थानमा रहेको छ।
प्रतिक्रिया राख्नुहोस्