उडेको केहीबेरमै फ्लाई दुबइको जहाजमा आगलागी

सोमबार राति काठमाडौंबाट दुबईका लागि उडेको फ्लाइ दुबईको जहाजको एउटा इन्जिनमा आगलागी भएको छ । जहाजको इन्जिनमा समस्या हुँदा काठमाडौंको आकाशमा ठूलो आवाजसहित आगो देखिएको थियो ।

उक्त जहाज काठमाडौंबाट बेलुका ९ बजेर २१ मिनेटमा दुबईका लागि उडेको थियो । उडेको केहीबेरमै एउटा इन्जिनमा आगो लागेपछि जहाजको आकस्मिक अवतरण हुने भन्दै त्रिभुवन अन्तर्राष्ट्रिय विमानस्थलमा सबै तयारी गरिएको थियो ।

काठमाडौंमा सबै तयारी गरिए पनि विमानका चालकले नेपाली आकाशमै रहेका बखत गन्तव्यमै पुग्ने भन्दै त्रिभुवन अन्तर्राष्ट्रिय विमास्थलमा अवतरण नगर्ने उडान जारी राख्ने जानकारी दिएको बताइएको छ ।

त्रिभुवन अन्तर्राष्ट्रिय विमानस्थल स्रोतका अनुसार विमानका पाइलटले दायाँ भागको इञ्जिनमा समस्या देखिएको एयर ट्राफिक कन्ट्रोलरलाई जानकारी गराएका छन् । तर, उनले त्रिभुवन अन्तर्राष्ट्रिय विमानस्थलमा अवतरण गर्ने तयारी गरेका छैनन् ।

विमानस्थलका एक अधिकारीका पाइलटले दुबई उडान गर्ने जोखिम नलिन सक्छन्, भारतमा मर्मतका लागि सुविधासँगै सहजता हुने भएकाले विमान भारतमा अवतरण गर्नसक्छन् ।

उता नागरिक उड्डयन प्राधिकरणका प्रवक्ता जगन्नाथ निरौलाले अनुसार इन्जिनमा समस्या भएको जहाज दुर्घटनाबाट जोगिएको बताउँदै अर्को इन्जिनले काम गरेपछि अहिले जहाज गन्तव्यतर्फ गएको जानकारी दिनुभएको छ ।

प्रवक्ता निरौलाले भन्नुभयो, ‘‘उड्ने बित्तिकै इन्जिनमा समस्या देखिएको हो । अहिले सामान्य अवस्थामा फ्लाइ दुबईको जहाज गन्तव्यतर्फ गइसकेको छ ।’’