दाहसंस्कारपछि पुष्टि भयो कोरोना संक्रमण- रिपोर्ट नआउँदै शव हस्तान्तरण, अस्पताल सिल गर्न आदेश

एक हप्ता अघि वीरगन्जस्थित नेसनल मेडिकल कलेज तथा शिक्षण अस्पतालमा उपचारको क्रमममा मृत्यु भएका वृद्धको दाहसंस्कारपछि कोरोना संक्रमणको पुष्टि भएको छ । कोरोना संक्रमणको पुष्टि भएपछि प्रशासनले सो अस्पताल सिल गर्न आदेश दिएको छ ।

समाचार अनुसार गत जेठ ४ गते भएका ती वृद्धको स्वाब परीक्षणको रिपोर्टमा कोरोना पोजिटिभ आएको नारायणी अस्पतालका प्रमुख मेडिकल सुपरिटेन्डेन्ट डा. मदनकुमार उपाध्यायले जनाउनुभएको छ । त्यस्तै उहाँले उपचारको क्रममा वृद्धको मृत्यु भइसकेको जानकारी नेसनल मेडिकल कलेजले आफूलाई जानकारी नगराएको आराप लगाउनुभएको छ ।

जेठ २ गते करिब साढे एक बजेको समयमा ती वृद्ध मेडिकल कलेजको आकस्मिक कक्षमा भर्ना भएका थिए । श्वासप्रश्वास, निमोनिया, क्षयरोगलगायतले ग्रस्त भएका ती वृद्ध सिकिस्त भएपछि चिकित्सकले उनलाई आईसीयूमा भर्ना गरे । श्वासप्रश्वास र निमोनिया भएकाले नारायणी अस्पतालबाट भीटीएम मगाएर उनको स्वाब संकलन गरी परीक्षणका लागि पठाइएको थियो ।

उपचारकै क्रममा दुई दिनपछि जेठ ४ मा ती वृद्धको मृत्यु भयो । तर, मेडिकल कलेजले ती वृद्धको स्वाब परीक्षण नतिजा नआउँदै शव परिवारको जिम्मा लगाएको थियो ।