नेकपा (एमाले)का अध्यक्ष केपी शर्मा ओलीले आफुले अन्य पार्टीका नेतालाई प्रधानमन्त्री बनाउने सम्बन्धमा कुनै आश्वासन नदिएको बताउनुभएको छ ।
केही दिनयता एमाले अध्यक्ष ओलीले केही नेतालाई प्रधानमन्त्री बनाउने आश्वासनन दिएका खबर आइरहका बेला आज विराटनगर विमानस्थलमा सञ्चारकर्मीहरुसँग कुरा गर्दै उहाँले सो प्रष्टिकरण दिनुभएको हो ।
त्यस क्रममा उहाँले नेपाली जनताले आगामी प्रदेश र संसदीय निर्वाचनमा पार्टीलाई अधिक स्थानमा विजयी गराउने जिकिर पनि गर्नुभयो ।
एमाले सङ्घीयता र लोकतन्त्रको रक्षा गर्न प्रतिबद्ध रहनाका साथै संविधान निर्माणमा महत्वपूर्ण भूमिका निभाएका कारण जनताले संसदीय निर्वाचनमा पहिलो पार्टी बनाउने धारणा राख्नुभयो ।
अध्यक्ष ओलीले आगामी संसदीय निर्वाचनमा अन्य कुनै वामपन्थी पार्टीसँग गठबन्धन नहुने बताउनुभएको छ । उहाँले मुलुकमा एमाले मात्र वामपन्थी पार्टी रहेको जिकिर गर्दै अन्य पार्टीहरु वामपन्थी नभएको आरोप लगाउनुभयो ।
पूर्वप्रधानमन्त्रीसमेत रहनुभएका ओलीले नेकपा एकीकृत ( समाजवादी)का कार्यकर्तालाई एमालेमा आए समाहित गरिने बताउनुभयो ।
उहाँले स्थानीय पालिकाको निर्वाचनले सबै निर्वाचनको स्थिति तय नगर्ने भन्दै सिट सङ्ख्याका हिसाबले केही कम आएर दोस्रो भए पनि लोकप्रिय मतका हिसाबले पार्टी पहिलो भएको जिकिर गर्नुभयो ।
प्रतिक्रिया राख्नुहोस्