लन्डनमा प्रा.डा. सूर्य सुवेदीको जीवनीको विमोचन
बेलायतलाई कर्मथलो बनाएर अध्यापन कार्यमा सक्रिय अन्तरराष्ट्रिय कानूनका ज्ञाता प्रा डा सूर्यप्रसाद सुवेदीको जीवनी लण्डनमा एक समारोहबीच विमोचन गरिएको छ।
बेलायतस्थित नेपाली दूतावासकी उपनियोग प्रमुख श्रीमती रोशन खनाल तथा एनआरएनएका पूर्व केन्द्रीय सल्लाहकार कुल आचार्यले “प्रा सूर्य सुवेदी महाविद्यावारिधिदेखि नोबेल पुरस्कार मनोनयनसम्म” नामक पुस्तक लोकार्पण गर्नुभएको हो ।
साउथ एसिया टाइम अनलाइनद्वारा आयोजित कार्यक्रमलाई सम्बोधन गर्दै श्रीमती खनालले नेपालमा संविधान निर्माणदेखि नेपाल सरकार विरुद्ध एनसेलको मुद्दामा महत्वपूर्ण सुझाव र सल्लाह दिएर प्रा. सुवेदीले मुलुकलाई गुन लगाएको बताउनुभयो । उहाँले प्रा सुवेदीजस्ता विज्ञहरुको विद्वता नेपालको हितमा उपयोग गर्नु पर्नेमा पनि जोड दिनुभयो ।
गैर आवासीय नेपाली संघका पूर्व केन्द्रीय सल्लाहकार कुल आचार्यले नेपालमा एमसीसी विवाद चर्कीरहेका बेला प्रा सुवेदीले व्याख्यात्मक टिप्पणी राख्न सुझाव दिएर विवाद सुल्झाउन योगदान गरेको सम्झना गर्नुभयो ।
उहाँले नेपाल-भारत सीमा विवाद लगायतका विवाद समाधान गर्न प्रा सुवेदीले दिएको सुझाव नेपालका लागि निकै उपयोगी भएको बताउँदै पुस्तकका लेखक पत्रकारद्वय भगीरथ योगी तथा नवीन पोखरेललाई धन्यवाद पनि दिनुभयो ।
उक्त पुस्तकको बारेमा बोल्दै अक्सफोर्ड विश्वविद्यालयसंग आबद्ध अनुसन्धानकर्ता डा. कृष्ण अधिकारीले लम्जुङ्गदेखि बेलायतसम्म प्रा सुवेदीको जीवन यात्रा रोचक र प्रेरणादायी रहेको बताउनुभयो ।
उहाँले प्रा सुवेदीको जीवनी पढ्दा आफूलाई बझांगी राजा जयपृथ्वीबहादुर सिंहको सम्झना आएको बताउँदै राजा जयपृथ्वी बहादुर सिंह जस्तै प्रा सुवेदी पनि अन्तरराष्ट्रियतावादी, मानवतावादी तथा कानूनी राज्यको पक्षधर भएको बताउनुभयो ।
विमोचन समारोहमा ‘बेलायतको प्रगतिको साझेदारको रुपमा दक्षिण एसियाली डायसपोराको भूमिका’ विषयमा बोल्दै प्रा सुवेदीले ब्रिटेनका हरेक जसो क्षेत्रमा दक्षिण एसियाली समुदायले राम्रो प्रगति गरेको बताउँदै बेलायतमा नेपालीले स्थायी बसोबास गर्न लागेको ढिलो भए पनि नेपाली आप्रवासी समुदायले व्यापार व्यवसाय, सेवा र प्राज्ञिक क्षेत्रमा उल्लेखनीय प्रगति गरिरहेको जनाउनुभयो ।
कार्यक्रममा सगरमाथाको सफल आरोहण गरेर कीर्तिमान कायम गरेका ुडबल अबभ नी एम्पुटीु भूतपूर्व गोर्खा हरि बुढा मगर, बार्नेट काउन्सिलका पूर्व डेपुटी मेयर लक्ष गुरुङ, कन्सलट्यांट नर्स सुमन श्रेष्ठ एमबीइ, डा कपिल रिजाल, उद्यमी योगेन क्षेत्री, उद्यमी उत्तम नेपाललाई सम्मानन गरिएको थियो ।
यसै गरी समाजसेवी रविन्द्र जंग लामिछाने, चर्चित कलाकार गोविन्द साह ‘आजाद,’ द मेक्सवर्थ फाउन्डेशनका संस्थापक संजय शाह, फेशन डिजाइनर संयुक्ता श्रेष्ठ, गायिका सितु खरेल, गोर्खा अभियानकर्ता ज्ञानराज राइ, एनआरएन अभियन्ता दयानिधि सापकोटा लगायत समाजका विभिन्न क्षेत्रमा योगदान गरेका व्यक्तित्वहरुलाई सम्मान गरिएको थियो। त्यस्तै प्रायोजकहरुलाई पनि सम्मान गरिएको थियो।
साहित्यकार डा संगीता स्वेच्छाले संचालन गरेको कार्यक्रममा साउथ एसिया टाइम अनलाइनका प्रधान सम्पादक भगीरथ योगीले सबैलाई स्वागत गरे भने सम्पादक डा जगन कार्कीले धन्यवाद ज्ञापन गर्नुभएको थियो ।
प्रतिक्रिया राख्नुहोस्