नेपाल प्रहरीले विश्वका विभिन्न मुलुकमा वैदेशिक रोजगारीमा पठाइदिने भन्दै ३०० जनाभन्दा बढीसंग १५ करोड रुपैयाँ ठगी गर्ने समूहलाई पक्राउ गरेको छ ।
प्रहरीले चितवनका २८ वर्षीय राजकुमार भट्ट, कास्कीका नवीन विक र पवन पन्तलाई कम्बोडिया, न्युजिल्यान्ड, फ्रान्सलगायत देश पठाइदिने भन्दै ठगी गरेको आरोपमा पक्राउ गरेको हो ।
काठमाडौं उपत्यका अपराध अनुसन्धान कार्यालयका अनुसार यो समूहले फेसबुक म्यासेन्जर, ह्वाट्सएप लगायत सामाजिक सञ्जालमा फेक आइडी बनाएर आकर्षक तलब भत्ता पाउने गरी रोजगारीका लागि कम्बोडिया, न्युजिल्यान्ड, फ्रान्सलगायत देश पठाउने विज्ञापन गरेका थिए ।
त्यसका आधारमा सम्पर्कमा आएकाहरुलाई बैंक खातामा निश्चित रकम जम्मा गर्न लगाउने गरेका थिए । त्यसपछि भिसा, वर्क परमिट, होटल बुकिङ, पुलिस रिपोर्ट लगायतका नक्कली कागजात तयार पारेर ५ देखि १० लाख रुपैयाँसम्म उठाउने र सम्पर्कविहीन हुन गरेको प्रहरी अनुसन्धानबाट खुलेको छ ।
पीडितले जसको खातामा रकम जम्मा गरेको हो, उसैका विरुद्ध उजुरी दिने गरेका थिए । तर, यो समूहले अरुकै खातामा रकम जम्मा गर्न लगाउने र चेक मार्फत रकम निकाल्ने गरेको पाइएको छ ।
त्यसरी रकम जम्मा गर्न खाता प्रयोग भएका राजकुमार बस्नेतविरुद्ध वैदेशिक रोजगार ठगी मुद्दा चलेको र, अदालतले मागेको धरौटी तिर्न नसकेकाले डिल्लीबजार कारागारमा रहेको प्रहरीले जनाएको छ ।
प्रतिक्रिया राख्नुहोस्