कामको खोजीमा पूर्वी पहाडबाट काठमाडौं आएकी एक १५ वर्षीया युवतीलाई जागीरा लगाइदिने प्रलोभन दिएर नेपाल प्रहरीमा कार्यरत रहेका एक सहित तीन व्यक्तिले पटकपटक बलात्कार गरेर गर्भवती बनाएको खुलासा भएको छ ।
घटना विवरण अनुसार संखुवासभाकी १५ वर्षीय किशोरी गत १५ माघ २०७९ मा घरबाट भागेर काठमाडौं आएर जसको शरणमाा बसिन त्यहीँ पटकपटक बलात्कृत भएकी हुन् ।
बलात्कारमा संलग्न रहेको आरोपमा प्रहरीले नेपाल प्रहरीका कर्मचारी संखुवासभाका २६ वर्षीय अजय लिम्बु, रसुवाका ३७ वर्षीय रामचन्द्र तामाङ, ३६ वर्षीय मिङ्गमा तामाङलाई पक्राउ गरेको छ ।
किशोरी अहिले गर्भवती भएको दुई महिना नाघेको प्रहरीको भनाइ छ । गर्भ बसेपछि विभिन्न व्यक्ति हुँदै परिवारसम्म पुगेर यो घटना बाहिर आएको हो । पीडितले बच्चा कसको हो भन्ने आफूलाई थाहा नभएको बताएकी छन् । प्रहरीले डीएनए जाँचका लागि नमूना समेत लिएको छ ।
पीडित किशोरीका दाइले काठमाडौं आएर प्रहरी वृत्त, बालाजुमा किटानी जाहेरी दिएका थिए । सोही जाहेरीको आधारमा प्रहरीले अनुसन्धान सकेर रायसहितको अनुसन्धान प्रतिवेदन जिल्ला सरकारी वकिलको कार्यालय, काठमाडौंमा पठाएको थियो ।
प्रतिवेदनका आधारमा जिल्ला अदालत, काठमाडौंमा सरकारी वकिलले मुद्दा दायर गरेको थियो । त्यस क्रममा अदालतले आइतबार तीनै जनालाई पुर्पक्षका लागि थुनामा पठाउने आदेश दिएको जिल्ला प्रहरी परिसर, काठमाडौंका एसपी सीताराम रिजालले जानकारी दिनुभयो ।
प्रतिक्रिया राख्नुहोस्