कोरोनाा भाइरस प्रतिरोधी खोपको व्यवस्था हुन नसक्दा पहिलो मात्रा लगाएका १५ लाख नागरिकले दोस्रो मात्रा लगाउन नपाइरहेका बेला प्रधानमन्त्री केपी शर्मा ओलीले सन् २०२१ भित्र अर्थात अबको ६ महिनाभित्र सबैलाई नागरिकलाई खोप लगाइने बताउनुभएको छ ।
बिहिबार नेपाल बाल संगठनको केन्द्रीय सभाको अधिवेशनलाई सम्बोधन गर्दै प्रधानमन्त्री ओलीले खोपको अभाव क्रमशः सुल्झँदै गएको र २०२१ भित्रै सबै नागरिकलाई खोप लगाइसकिने दावी गर्नुभएको हो ।
भर्चुअल माध्यममार्फत कार्यक्रमलाई सम्बोधन गर्नुभएका प्रधानमन्त्री ओलीले सबैलाई खोप लगाइसकिएपछि अबका वर्ष यस्ता कार्यक्रम भर्चुअल माध्यमबाट नभई प्रत्यक्ष भेटेर नै गर्न सकिने समेत बताउनुभयो ।
कार्यक्रमलाई सम्बोधन गर्दै प्रधानमन्त्री ओलीले बालबालिका नै देशको भविष्य भए पनि विगतमा राजनीतिक र सामाजिक व्यवस्थाका कारण सबै बालबालिकाले उपयुक्त लालनपालन, शिक्षा र खेलकुद जस्ता पाउनै पर्ने हक समेत नपाएको उल्लेख गर्नुभयो ।
उहाँले विगतका प्रायः सबै सरकारको ध्यान नगएको र कहिले काहीँ बालमन्दिर जस्ता संस्था निजी स्वार्थका माध्यम हुन पुगेको बताउनुभयो ।
प्रतिक्रिया राख्नुहोस्