मधेश आन्दोलनका क्रममा २५ भदौ २०७२ मा महोत्तरीमा भएको सशस्त्र प्रहरी बलका असई थमन बिकको हत्या अभियोगमा जन्मकैद सजायँ सुनाइएका एकजना पक्राउ परका छन् ।
पक्राउ पर्नेमा पूर्व प्रदेश सांसद कौशलकुमार यादव रहेका छन् । असई विक हत्या मुद्दामा २८ साउन २०७५ मा महोत्तरी जिल्ला अदालतमा २८ जनाविरुद्ध कर्तव्य ज्यान मुद्दा दर्ता भएको थियो । अदालतमा मुद्दा चलिरहँदा उनी फरार नै थिए ।
अदालतले सजायँ सुनाए पनि फरार रहेका यादवलाई शनिबार राति महोत्तरीको साम्सी गाउँपालिका ५ पोखरीभण्डाबाट पक्राउ गरेको महोत्तरीका प्रहरी प्रवक्ता डीएसपी सन्तुलाल जयसवालले जानकारी दिनुभयो ।
लोसपाका नेतासमेत रहेका यादव लामो समयदेखि फरार थिए । फरार रहेकै अवस्थामा २०७४ मा तत्कालीन संघीय समाजवादी फोरमबाट महोत्तरी क्षेत्र नं. ४ (क) मा प्रदेश सांसद निर्वाचित भएका थिए ।
महोत्तरी जिल्ला अदालतले २८ मंसिरमा असई थमन विक हत्या प्रकरणमा लोसपा मधेश प्रदेश संसदीय दलका नेता अभिराम शर्मासहित सातजनालाई जन्मकैदको सजाय सुनाएको थियो भने एमाले प्रतिनिधिसभा सदस्य लक्ष्मी महतो र पुर्पक्षका लागि थुनामा रहेका पवन कापरले सफाइ पाएका थिए ।
प्रतिक्रिया राख्नुहोस्