शनिबार वाग्मती नदीमा वेपत्ता भएका दुई भारतीय पर्यटकको शव फेला परेको छ। रौतहटको चन्द्रपुर नगरपालिका १, मा पर्ने पर्यटकीय क्षेत्र नुनथर घुम्न आएका भारतीय युवक ३० वर्षीय मयङ्क अग्रवाल र सोही उमेरका गोलुकुमार शनिबार साँझदेखि बागमती नदीमा बेपत्ता हुनुहुन्थ्यो।
भारतको सीतामढी कोट बजारका मयङ्क र गोलुकुमार दुवैको शव आइतबार दिउँसो २ बजेतिर रौतहटको चन्द्रपुर नगरपालिका वडा नम्बर ९ र रौतहटकै वृन्दावन नगरपालिका वडा नम्बर १ को सीमा क्षेत्रस्थित बागमती नदीमै फेला परेको इलाका प्रहरी कार्यालय चन्द्रनिगाहपुरका प्रहरी नायब उपरीक्षक सन्तुलाल जैसवारले जानकारी दिनुभयो।
नुनथरमा घुम्न आएका मयङ्क र गोलुकुमारलाई नदीले बगाएको स्थानभन्दा झण्डै १५ किलोमिटर दक्षिण एकै ठाउँमा शव फेला परेको प्रनाउ जैसवारले बताउनुभयो। आइतबार दिउँसो स्थानीयले मृतक दुवैको शव देखेपछि प्रहरीमा खबर गरेका थिए ।
भारतीय नम्बर प्लेट बीआर०१एचएफ६६१९ नम्बरको कारमा घुम्न आएका तीनजनामध्ये नदीमा डुबेका एकजनाको भने उद्धार गरिएको थियो ।
प्रतिक्रिया राख्नुहोस्