संयुक्त राष्ट्रसङ्घीय एक प्रतिवेदनमा पछिल्लो एक दशकमा भूमध्यसागर पार गरेर युरोप जाने क्रममा करिब ३० हजार आप्रवासी मृत वा बेपत्ता घोषित भएको बताइएको छ ।
शरणार्थी र आप्रवासीका लागि संयुक्त राष्ट्रसङ्घीय निकाय र अनुगमन समूह मिक्स्ड माइग्रेसन सेन्टरको एक प्रतिवेदन अनुसार अफ्रिका स्थलमार्गमा चरम हिंसा, दुव्र्यवहार र शोषणको सामना गर्नुपरेको उल्लेख गरिएको छ ।
शरणार्थी र आप्रवासीहरूसँग ३१ हजारभन्दा बढी अन्तर्वार्ताको आधारमा तयार रिपोर्टले २०२० जनवरीदेखि सन् २०२४ मेको बीचमा सहारा मरुभूमि पार गर्ने क्रममा एक हजार १८० व्यक्तिको मृत्यु भएको उल्लेख गरेको छ ।
संयुक्त राष्ट्रसङ्घको अन्तर्राष्ट्रिय आप्रवासन सङ्गठनका लरेन्स हार्टले जेनेभामा पत्रकारसँग कुरा गर्दै मरुभूमिमार्गमा दैनिक पाँच जनाको मृत्यु हुने गरेको जानकारी दिनुभयो । यी सङ्ख्याहरू एक विशाल अवमूल्यन भएको विश्वास गरिन्छ ।
– यातना, अपहरण, बलात्कार –
तथ्याङ्कको अभाव भए तापनि प्रतिवेदन तयार पार्न खटेका निकायहरूले प्रत्येक वर्ष हजारौंको मृत्यु हुने गरेको बताएका छन् ।
“मरुभूमिमा शरणार्थी र आप्रवासीको मृत्यु समुद्रमा हुनेभन्दा दोब्बर भएको अनुमान गरिएको छ,” उनीहरूले एक विज्ञप्तिमा उल्लेख गरेका छन् ।
मध्य र पश्चिमी भूमध्यसागरका लागि यूएनएचसीआरका विशेष दूत भिन्सेन्ट कोचेटेलले भन्नुभयो, “साहारा पार गर्ने सबैका लागि, तपाईंले शवहरू देखेको, फ्याँकिएको प्रमाण पाउनुहुन्छ । सहारा पार गरेका सबैले मरुभूमिमा मृत्यु भएका मानिसहरूबारे बताउन सक्छन् ।”
हिँडडुल गर्नेहरूले यातना, फिरौतीका लागि अपहरण, मानव बेचबिखन, यौन हिंसा, डकैती, स्वेच्छाचारी हिरासत र सामूहिक निष्कासनको सामना गर्नुपर्ने प्रतिवेदनमा उल्लेख छ ।
मरुभूमि पार गर्ने आप्रवासीहरूलाई प्रायः मानव तस्करहरूले मरूभूमि क्षेत्रमा अलपत्र छोड्ने गरेको र बिरामी हुनेहरूलाई कहिलेकाहीं पिकअप ट्रकमा राखि फ्याँकिने गरेको पनि विवरणमा उल्लेख छ ।
“यो मार्गका केही देशहरूमा मानिसहरूले अकल्पनीय भयावहताको सामना गर्नुपरेको तर जोखिमपूर्ण भूमि पार गर्ने प्रयास गर्ने मानिसहरूको सङ्ख्यामा वृद्धि भएको रिपोर्टमा उल्लेख गरिएको छ ।
प्रतिक्रिया राख्नुहोस्