जापान र कम्बोडियाको सहकार्यमा युक्रेनबाट बारूदी सुरूङ हटाइने
जापानका विदेशमन्त्री योको कामिकावाले युक्रेन र अन्य युद्धग्रस्त मुलुकबाट बारूदी सुरूङ हटाउन कम्बोडियासँग मिलेर काम गर्ने बताउनुभएको छ ।
कम्बोडियामा सन् १९९८ मा समाप्त भएको करिब तीन दशक लामो द्वन्द्वमा लाखौं बारूदी सुरूङ बिछ्याइएको थियो । दक्षिणपूर्वी एशियाली मुलुक कम्बोडिया बारूदी सुरूङ व्यवस्थापनका लागि विश्वका केही अग्रणी मुलुकमध्ये एक हो । कम्बोडियाले सन् १९९८ देखि जापानसँग हतियार हटाउने काममा सहकार्य गरिरहेको छ ।
“कम्बोडिया जापानको विश्वव्यापी बारूदी सुरङ हटाउने प्रयासमा एक आवश्यक साझेदार हो,” कामिकावाले एक पत्रकार सम्मेलनमा भन्नुभयो । “मलाई विश्वास छ, कम्बोडियाले कर्मचारी–विरोधी बारूदी सुरङहरूको अमानवीयताको बारेमा जागरूकता बढाउन ठूलो योगदान पुर्याउनेछ ।
जापानले अर्को हप्ता युक्रेनलाई एउटा ठूलो ‘डिमिनिङ मेसिन’ उपलब्ध गराउने र अगस्टमा कम्बोडियामा युक्रेनी निकायहरूलाई उपकरण कसरी प्रयोग गर्ने भनेर प्रशिक्षण दिने उहाँले बताउनुभयो । कम्बोडियाली माइन एक्सन सेन्टर (सीएमएसी) का महानिर्देशक हेङ रतनाले पत्रकारसँग भन्नुभयो उहाँको सङ्गठन र स्थानीय डेमिनरहरूले यस महत्त्वपूर्ण पहलप्रति गर्व गरेका छन् र सहयोगको नयाँ रणनीतिलाई दृढतापूर्वक समर्थन गर्दछन् ।”
“कम्बोडियाली सरकारको नीतिअनुसार बारूदी सुरङ र युद्धका अवशेषको समस्या भएका देशसँग अनुभव आदानप्रदान गर्न पाउँदा हामी हर्षित छौं,” उहाँले भन्नुभयो । सन् २०२२ मा रूसले आक्रमण गरेदेखि नै बारूदी सुरुङ र विष्फोटक पदार्थले भरिएको युक्रेनमा बारूदी सुरूङ विस्फोटका कारण हुने मृत्यु प्राय: सर्वसाधारण र सैनिकमा हुने गरेको छ ।
ह्युमन राइट्स वाचका अनुसार युक्रेनका २७ क्षेत्रमध्ये ११ क्षेत्रमा बारूदी सुरङको अभिलेखीकरण गरिएको छ । रूसी सेनाले सन् २०२२ को फेबु्रअरीदेखि अहिलेसम्म कम्तीमा १३ प्रकारका ‘एन्टी पर्सनल माइन’ प्रयोग गरेको बताइएको छ ।
यसैबीच कम्बोडियामा सन् १९६० को दशकदेखि सुरु भएको दशकौँ लामो युद्धका कारण फ्याँकिएका गोलाबारुद र हातहतियारले भरिएको छ । सन् १९७९ यता करिब २० हजार जनाको बारूदी सुरूङ विष्फोट भई मृत्यु भएको र यसको दोब्बर सङ्ख्या घाइते भएको छ ।
गत वर्षको अगष्टमा देशको उत्तरपूर्वी क्षेत्रमा रहेको एक विद्यालयभित्र युद्धबाट बचेका हजारौं नफुटेका हतियार फेला परेका थिए । सन् २०१८ मा दक्षिणी कम्बोडियामा एक प्रशिक्षण अभ्यासका क्रममा युद्धकालमा भएको विस्फोटमा एक अस्ट्रेलियाली र एक कम्बोडियालीको मृत्यु भएको थियो ।
सरकारले सन् २०२५ सम्ममा सबै बारूदी सुरूङ र नफुटेका विस्फोटक पदार्थ सफा गर्ने प्रतिबद्धता जनाएको छ ।
प्रतिक्रिया राख्नुहोस्