खेलकूदको विकासका लागि खेलाडीलाई प्रोत्साहन गर्ने उद्देश्यले राष्ट्रिय खेलकुद विकास नियमावली–२०७९ मा विभिन्न अन्तर्राष्ट्रिय प्रतियोगिताहरुमा पदक जित्ने खेलाडीलाई नगद पुरस्कार दिने व्यवस्था छ ।
सोही व्यवस्था अनुसार नेपालको खेलकूद इतिहासमै पहिलोपटक पारा ओलम्पिकमा काँस्य पदक जित्न सफल तेक्वान्दो खेलाडी पलेशा गोबद्र्धनले नेपाल सरकारबाट ६५ लाख रुपियाँ पुरस्कार पाउनुहुनेछ । यो ओलम्पिकमा कुनै पनि खेलाडीले जितेको पहिलो ऐतिहासिक पदक हो ।
फ्रान्सको पेरिसमा जारी पारा ओलम्पिकमा पलेशाले शनिबार के–४४ वर्गअन्तर्गत महिला ५७ केजीमुनिको स्पर्धामा २१ वर्षीया पलेशाले सर्वियाकी मारिजा मिचेभलाई १५–८ ले हराउँदै काँस्य जित्नुभएको हो ।
पलेशाले पहिलो चरणको खेलमा भेनेजुएलाकी भलेरिया मोराल्सलाई ३१–० ले पराजित गर्दै क्वार्टरफाइनलमा स्थान बनाउनुभएको थियो । तर, क्वार्टरफाइनलमा उहाँ ब्राजिलकी सिल्भाना फर्नान्डेससँग १०–८ ले पराजित हुनुभएको थियो ।
दोस्रो चरणमा पराजित भएपछि रिपाचेजको मौका पाउनुभएकी उहाँले फ्रान्सकी सेफी कार्भजनलेलाई २–१ ले हराउँदै काँस्यको भिडन्त पक्का गर्नुभएको थियो । त्यसपछि उहाँले अन्तिममा सर्वियाकी मारिजालाई स्तब्ध बनाउँदै काँस्य पदक आफ्नो पोल्टामा पार्नुभएको थियो
।
राष्ट्रिय खेलकुद विकास नियमावलीमा ओलम्पिक, एसियाली खेलकुद, दक्षिण एसियाली खेलकुद (साग), विश्व च्याम्पियनसिप लगायत अन्तर्राष्ट्रिय प्रतियोगितामा पदक विजेता खेलाडीले पाउने पुरस्कारबारे उल्लेख गरिएको छ ।
सोही नियमावलीमा भएको ब्यवस्था अनुसार गत वर्ष चीनको होङझावमा चौथो एसियाली पारा खेलकुदमा पनि काँस्य जित्नु भएकी पलेशाले १३ लाख रुपियाँ पुरस्कार पाउनुभएको थियो ।
यस्तै नियमावली अनुसार पलेशाको प्रशिक्षकले पाँच लाख ८५ हजार, व्यवस्थापकले दुई लाख ९२ हजार र सम्बन्धित खेल सङ्घले ११ लाख ७० हजार रुपियाँ पुरस्कार पाउनेछन् ।
प्रतिक्रिया राख्नुहोस्