गण्डकी प्रदेशका स्वतन्त्र सांसद दीपक मनाङ्गे हरेकपटकको सरकार गठनमा निर्णायक बन्दै आएका दीपक मनाङ्गे पाँच महिनाको बीचमा तीनपटक मन्त्री बन्दै बाहिरिंदै गर्नुभयो ।
विगत पाँच महिनामा संघीय सरकार परिवर्तनकाबीच पाँच महिनाको अवधिमा गण्डकी प्रदेशमा तीनवटा सरकार बन्यो र तीनवटैमा मनाङे्गेको समर्थनमा मुख्यमन्त्रीले विश्वासको मत लिन सफल हुनुभयो ।
पछिल्लो समय कांग्रेस माओवादी, त्यसपछि एमाले माओवादी र अहिले कांग्रेस र एमाले सत्ता समीकरण भएपछि गण्डकी प्रदेशको सरकार पनि अस्तव्यस्त थियो । कहिले बहुमत नपुग्ने, कहिले अदालतले खारेज गर्ने जस्ता काम हुँदै गर्दा दीपक मनाङ्गे निर्णायक हुनुहुन्थ्यो ।
गण्डकीका वर्तमान मुख्यमन्त्री सुरेन्द्रराज पाण्डेलाई समर्थन गरेर भौतिक पूर्वाधार मन्त्री बन्नुभएका मनाङेका विवादास्पद गतिविधिका कारण एमालेले हटाउन दवाव दिइरहेको थियो ।
तर, मुख्यमन्त्री पाण्डेले संकटका बेला विश्वासको मत दिएर सहयोग गरेको भन्दै मन्त्रीमा कायमै राखिरहेका बेला सोमबार एमालेको सहभागितामा प्रदेश मन्त्रिमण्डल हेरफेर भएपछि भने दीपकले पदबाट राजीनामा दिनुभयो ।
नयाँ गठबन्धन बनेपछि भागवण्डा पुर्याउन गण्डकीमा मन्त्रालय संख्या ९ बनाएपछि ५ वटा कांग्रेसले र ४ वटा एमालेले लिने सहमति भएको थियो । कांग्रेसले मनाङ्गे र फणिन्द्र देवकोटालाई आफ्नो कोटाबाट मन्त्री बनाएको थियो । मनाङेले छाडेपछि अब वन मन्त्रालयमा कांग्रेसबाट मन्त्री बन्नेछन् ।
मन्त्रिपरिषदलाई पूर्णता दिँदा एमालेबाट प्रकाशबहादुर केसी भौतिक पूर्वाधार तथा यातायात व्यवस्था मन्त्री, पद्मा जिसी कृषि, भूमि व्यवस्था तथा सहकारी, कृष्णप्रसाद पाठक स्वास्थ्यमन्त्री, मित्रलाल बस्याल उद्योग तथा पर्यटन मन्त्री बन्नुभएको छ ।
कांग्रेसबाट अर्थमा डा. टकराज गुरुङ, सामाजिकमा विन्दुकुमार थापा र ऊर्जा, जलस्रोत तथा खानेपानी मन्त्रीमा फणीन्द्र देवकोटाको जिम्मेवारी यथावतै रहेको छ ।
तर मुख्यमन्त्री पाण्डेले मनाङ्गेले सम्हालेको भौतिक पूर्वाधारसहित ४ मन्त्रालय एमालेलाई दिएर मनाङेलाई भने वन तथा वातावरण मन्त्रालयको जिम्मेवारी दिएपछि उहाँले राजीनामा दिनुभयो ।
सत्ता भागवण्डाको खेलमा आफू पिल्सिएको र काम र बजेट नै नभएको मन्त्रालय दिएको भन्दै राजीनामा दिनुभएका मनाङ्गेले मन्त्री बन्दाबन्दा अल्छी लागेको बताउँदै कांग्रेसलाई डेढ करोडमा मन्त्रालय बेचिदिएँ भन्दै बाहिरिनुभएको थियो ।
सत्ताको अंकगणितमा निर्णयक बन्दै गण्डकी प्रदेश सभाको दोस्रो कार्यकालसम्म आइपुग्दा मनाङ्गे छैठौं पटक मन्त्री हुनुभएको थियो ।
प्रतिक्रिया राख्नुहोस्