जापान सरकारले जाजरकोटको भेरी त्रिवेणी माविको कक्षाकोठा पुनर्निर्माणका लागि सहयोग गर्ने भएको छ । आज बिहिबार काठमाडौंस्थित जापानी राजदूतावासमा यस सम्बन्धी सम्झौतामा हस्ताक्षर भएको छ ।
नेपालका लागि जापानी राजदूत किकुता युताका र स्वयंसेवी कोर्प्स नेपाल (भीसीएन)का अध्यक्ष दीपक चापागाईंले विद्यालय भवन पुनर्निर्माणअनुदान सम्झौतामा हस्ताक्षर गर्नुभएको छ ।
जापानले उक्त परियोजनाको लागि करिब दुई करोड २७ लाख रुपैयाँ (एक लाख ७० एक सय ५९ अमेरिकी डलर) उपलब्ध गराउने छ । सन् १९८५ मा स्थापित भएको विद्यालयले जाजरकोट र नजिकैका जिल्लाहरूका लगभग ५०० विद्यार्थीहरूको प्रमुख शैक्षिक संस्थाको रूपमा सेवा गर्दै आएको छ ।
सहयोग अनुदानबाट १२ कक्षाकोठासहितको दुई तले भवनको पुनर्निर्माणमा हुनेछ । जापानको सहयोगमा निर्मित हुने कक्षा कोठाहरूले विद्यार्थी र शिक्षकहरूका लागि सुरक्षित र प्रभावकारी शैक्षिक वातावरण प्रदान गर्ने अपेक्षा गरिएको छ ।
यस परियोजनाले शैक्षिक वातावरणमा सुधार मात्र नभई भूकम्पपछिको पुनर्निर्माणको प्रतिकका रूपमा रहेको जाजरकोट क्षेत्रलगायत नेपालको विकासमा पनि योगदान पूर्याउने जापानी दूतावासले विश्वास लिएको छ ।
‘यो सहयोगले अहिले र भावी पुस्ताका लागि जापान र नेपाली जनताबीचको मित्रतालाई अझ प्रगाढ बनाउने विश्वास पनि लिएका छौँ’ जापानी दूतावासद्वारा जारी विज्ञप्तिमा उल्लेख छ ।
प्रतिक्रिया राख्नुहोस्