सरकारी ढिलासुस्तीका कारण दशैं तिहारको बेला आम उपभोक्ता महंगीको मारमा पने भएका छन् । समयमै चिनी आयातको अनुमति सरकारले नदिंदा अहिले चिनी अभाव भैरहेको छ ।
अभावको मौका छोपी चिनी व्यापारीहरु कालोबजारीमा लागेका छन् । अहिले चिनीको मूल्य प्रतिकिलो १४० रुपैयाँभन्दा बढी भएको छ ।
यसबीच वाणिज्य विभागले चिनी लुकाएर कालोबजारी गरेको आरोपमा काठमाडौंको सबैभन्दा ठूलो चिनी गोदाम सिल गरेको छ ।
कुलेश्वरमा रहेको गृहेश्वरी ट्रेडलिंकको गोदाममा करिब ७० हजार किलो चिनी कृत्रिम भण्डारण गरेर राखिएको र लेबल अस्पष्ट भएको चिनीको गोदाम सिल गरेको हो ।
व्यवसायी सन्तोष खेतानको उक्त फर्मले उद्योगहरुबाट सस्तोमा खरिद गरेको चिनी काठमाडौंमा बिल बिजकविना नै महँगो मूल्यमा बिक्री गरेको आरोपमा विभागमा उजुरी परेको थियो ।
खुद्रा व्यापार संघका अधिकारीहरुका अनुसार १२७ रुपैयाँ किलो होलसेलमा चिनी बिक्री गरेर खेतानले १०५ रुपैयाँको मात्रै बिल दिने गरेका थिए ।
दुई साता अघिसम्म ११० रूपैयाँ किलोमा बिक्री भइरहेको चिनी पछिल्लो समय एकाएक १४० रूपैयाँ किलोसम्म पुर्याइएको छ ।
प्रतिक्रिया राख्नुहोस्