पूर्व प्रधानमन्त्री डा. बाबुराम भट्टराईले सरकार तथा राजनीतिक दलका नेताहरुलाई मुलुकको गम्भीर आर्थिकक अवस्थाप्रति सचेत भएर अघि बढ्न सुझाव दिंदै अब राजनीतिको मात्र बाँसुरी बजाएर देश नचल्ने बताउनुभएको छ ।
सामाजिक सञ्जालमार्फत डा. भट्टराईले रोम जल्दै थियो, ‘बादशाह बाँसुरी बजाउँदै’ थिए भन्ने सन्दर्भ राख्दै मुलुकको आर्थिक अवस्था जर्जर रहे पनि सरकार र नेताहरु राजनीतिमा मात्रै केन्द्रित हुनु दुःखद भएको बताउनुभयो ।
उहाँले भन्नुभएको छ, देश गम्भीर आर्थिक संकट र मन्दीबाट गुज्रदै छ । बाध्यात्मक अवस्थामा वैदेशिक रोजगारीमा गएका नागरिकले पठाएको रेमिट्यान्स बाहेक अर्थतन्त्रका कुनै सूचक सकारात्मक छैनन्। बरू गम्भीर ढंगले नकारात्मक र विपरित दिशातर्फ उन्मुख छन् ।
उहाँले मुलुकको वर्तमान आर्थिक समस्या तत्कालिक र सामान्य प्रकृतिका नभएर दीर्घकालिक र संरचनात्मक प्रकृतिका रहेकाले यसको उचित समाधानका लागि गम्भीर विमर्श हुनुपर्ने बताउनुभएको छ ।
उहाँ लेख्नुहुन्छ, “गत साठी वर्ष यता वार्षिक आर्थिक वृद्धिदरले कहिल्यै दुई अंक छोएको छैन । वर्तमान नेपाल राज्य बनेयता अर्थात् सुगौली सन्धियता वैदेशिक व्यापार घाटा बढेको बढ्यै छ ।वैदेशिक ऋण बढेको बढ्यै छ । महॅगी निरन्तर उकालो छ । भ्रष्टाचार चुलिएको चुलियै छ ।”
“त्यस्तै औद्योगिक उत्पादनले दुई अंक नाघ्न सधैं कनिकुथी गरिरहेकै छ । जनशक्ति पलायन त निरन्तर भैरहेकै थियो, केही समय यता पुॅजी समेत पलायन भैरहेको बताइन्छ । दशैंको मुखमा प्रायः चलायमान हुने बजार यसपटक सुनसान हुने छनक देखिदैछ।”
भावी आर्थिक अवस्थाको चित्र यस्तो रहे पनि देशमा गम्भीर आर्थिक विमर्श र राज्यको तर्फबाट गम्भीर नीतिगत र व्यवहारिक पहल र हस्तक्षेप नहुनु जनतालाई आज मरे भोलि ओखती हुने उहाँले बताउनुभएको छ ।
डा. भट्टराईले अन्त्यमा सबैले राजनीतिदेखि राजनीतिसम्मको बाँसुरी बजाउनु सट्टा अर्थतन्त्र र अर्थनीतिबारे नि चासो लिन सुझाव दिनुभएको छ ।
प्रतिक्रिया राख्नुहोस्