चलचित्र ‘रावायण’मा अभिनय गर्ने भनेर वैना रकम लिएर काम नगरी ठगी गरेको अभियोगमा पक्राउ परेका नायक अनमोल केसीले हाजिरी जमानीमा रिहा भए लगत्तै निर्माताको रकम फिर्ता गरेका छन् ।
आइतबार हाजिरी जमानीमा रिहा भएका अनमोलले सोमबार चलचित्र ‘रावायण’का निर्मातालाई प्रहरीमार्फत आफूले लिएको १० लाख रुपैयाँ फिर्ता गरेका हुन् ।
केसी उक्त रकम नबिल बैंकमा आफ्नो नाममा रहेको खाताको चेक निर्मात्री कटुवालको नाममा काटेर बैंकमा डिपोजिट गरेपछि भौचर प्रहरीमा बुझाएको समाचारमा जनाइएको छ ।
‘रावायण’को विवादमा निर्मात्री कटुवालले अनमोलविरुद्ध उजुरी दिएकी थिइन् । केसीले १० लाख रुपैयाँ पेश्की रकम लिएर पनि फिल्ममा काम गर्न नमानी आर्थिक विश्वासघात गरेको जाहेरीमा उल्लेख थियो ।
प्रहरीले गरेको सोधपुछमा अनमोलले आफूले १० लाख फिर्ता गर्न खोज्दा पनि ‘रावायण’का निर्माताले लिन अस्वीकार गरेको बताएका थिए । साथै, स्क्रिप्ट चित्त नबुझेर प्रोजेक्ट अस्वीकार गरेको बताएका थिए ।
प्रतिक्रिया राख्नुहोस्