टी २० विश्व क्रिकेटमा विश्व कीर्तिमान कायम गर्न सफल नेपाल प्रहरीमा आबद्ध दीपेन्द्रसिंह ऐरी सहायक हवल्दारमा बढुवा हुनुभएको छ । २०७३ सालदेखि नेपाल पुलिसमा आबद्ध अलराउन्डर क्रिकेट खेलाडी ऐरी यसअघि उहाँ प्रहरी जवान हुनुहुन्थ्यो ।
चीनको हाङझाउमा भएको १९ औँ एसियाली खेलकुद प्रतियोगिता अन्तर्गत पुरुष क्रिकेटमा राष्ट्रिय क्रिकेट टोलीका खेलाडी ऐरीले विश्व कीर्तिमान कायम गर्न सफल हुनुभएको थियो ।
यही असोज १० गते भएको नेपाल र मङ्गोलियाबीचको खेलमा खेलाडी ऐरीले नौ बलमा अर्धशतक प्रहार गर्दै विश्व कीर्तिमान कायम गर्नुभएको थियो ।
उहाँले नौ बल खेल्दा आठ छक्का र एक बलमा दुई रन लिँदै नौ बलमै अर्धशतक पूरा गरेर कीर्तिमान बनाउनुभएको हो । यसअघि उक्त कीर्तिमान भारतीय खेलाडी युवराज सिंहको नाममा अङ्कित थियो । भारतीय खेलाडी सिंहले १२ बलमा अर्धशतक बनाउँदै कीर्तिमान कायम गर्नुभएको थियो ।
विश्व कीर्तिमान कामय गरेबापत नेपाल प्रहरीले उहाँलाई पदोन्नति दिएको नेपाल प्रहरीका प्रवक्ता प्रहरी नायब महानिरीक्षक कुवेर कडायतले बताउनुभयो ।
प्रतिक्रिया राख्नुहोस्