पूर्व उपप्रधान तथा गृहमन्त्री एवं राष्ट्रिय स्वतन्त्र पार्टी (रास्वपा)का सभापति रवि लामिछानेलाई पक्राउ गर्न अदालतले अनुमति दिएसंगै सो पार्टीको कार्यालयमा समर्थकको ठूलो भीड लागेको छ ।
समाचार अनुसार काठमाडौं वनस्थलीमा रहेको पार्टी कार्यालय परिसरमा अहिले धेरै संख्यामा प्रहरी परिचालन भएका छन् भने पार्टी मुख्यालयको प्रवेशद्वार पनि बन्द गरिएको छ ।
जिल्ला प्रहरी कार्यालय, कास्कीले सहकारी ठगी प्रकरणमा अनुसन्धानका लागि सभापति लामिछानेलाई हिरासतमा राख्न अनुमति दिएको छ । लामिछानेलाई पक्राउ गरेर कास्की लैजाने प्रहरी तयारी छ ।
पक्राउ पुर्जी जारी भएपछि सभापति रवि लामिछानेले प्रधानमन्त्री केपी ओली र सरकारको चर्को आलोचना गर्दै टिप्पणी गर्नुभएको छ- “सरकार मर्यो, हामीलाई जुठो पर्यो, ‘तपाईंको हातमा तस्करले दिएको करोड पर्ने घडी , मेरो हातमा चाहि हतकडी ? भ्रष्टाचारीबाट करोडौंको जग्गा खुल्लमखुल्ला लिने- मैले ठगीको आरोप खेपिदिनुपर्ने ?”
पोखराको सूर्यदर्शन समेतका ७ सहकारीबाट ६५ करोड रुपैयाँ गोर्खा मिडिया नेटवर्कमा गएको अनुसन्धानबाट खुलेको छ । रवि गोर्खा मिडियाले संचालन गरेको ग्याललेक्सी फो के टेलिभिजनको प्रबन्ध निर्देशक रहेको र सहकारीबाट आएको रकम खर्च गर्न संलग्न भएको भन्दै संसदीय छानबिन समितिले कारबाहीको सिफारिश गरेको थियो ।
संसदीय छानबिन समितिले रवि लामिछानेले कुनै पनि सहकारीबाट आफ्ना नाममा ऋण लिएको तथ्य प्रमाण नभेटिए पनि गोर्खा मिडियामा आएको रकम कार्यालय प्रयोजनका लागि खर्च गर्न चेकमा हस्ताक्षर गरेको उल्लेख गरेको छ ।
प्रतिक्रिया राख्नुहोस्