भन्सार छलीका विभिन्न सामान बरामद
धनुषा जिल्लाको मिथिला नगरपालिका १० स्थित बडहरीबाट कार्तिक १३ गते सशस्त्र प्रहरीले करीब १७ लाख ३१ हजार रुपैयाँ बराबरको मोबाईलको डिस्प्ले र लत्ताकपडा बरामद गरेको छ ।
सशस्त्र प्रहरी बल नेपाल राजश्व भन्सार सुरक्षा बेश जनकपुरले विशेष सूचनाको आधारमा अबैध रुपमा गोदाममा स्टोर गरी राखिएको अवस्थामा उल्लेखित मुल्य बराबरको २ हजार ९ सय ६० वटा मोबाईलको डिस्प्ले र लत्ताकपडा बरामद गरिएको हो ।
बरामद सामान राजश्व भन्सार कार्यालय जनकपुरमा बुझाईएको छ । यसै गरी रौतहटमा बिल बिजक नभएको लत्ताकपडा लिएर आउँदै गरेका एकजनालाई मोटरसाईकल नियन्त्रणमा लिइएको छ ।
रौतहट जिल्लाको राजपुर नगरपालिका २ फतुहाबाट कार्तिक १४ गते सशस्त्र प्रहरीले करीब २ लाख १६ हजार रुपैयाँ बराबरको चोरीपैठारीको लत्ताकपडासहित मोटरसाईकल नियन्त्रणमा लिएको छ ।
भारतबाट अवैध रुपले बीआर ०५ एल ३५९० नम्बरको मोटरसाईकलमा राखी नेपालतर्फ ल्याउँदै गरेको लत्ताकपडा बिल बिजक फेला नपरेपछि नं. ११ गण रौतहटले नियन्त्रणमा लिएको हो ।
यसै गरी सोही जिल्लाको यमुनामाई गाउँपालिका ४ बमनहर ईलाकाबाट करीब १ लाख ३२ हजार रुपैयाँ बराबरको लत्ताकपडा बरामद गरिएको छ ।
बिलबिजक नभएको उल्लेखित मुल्यको लत्ताकपडा सशस्त्र प्रहरी बल नेपाल सुरक्षा बेश फतुहाले बरामद गरेको हो । बरामद लत्ताकपडा तथा मोटरसाईकल गौर भन्सार कार्यालय रौतहटमा बुझाईएको छ ।
प्रतिक्रिया राख्नुहोस्