गत असोजमा आफ्नै सहकर्मी महिला प्रहरीमाथि बलात्कारको प्रयास गर्ने धादिङको इलाका प्रहरी कार्यालय खानीखोलाका तत्कालीन प्रहरी निरीक्षक (इन्सपेक्टर) अपूर्व ढुंगानालाई पुर्पक्षका लागि थुनामा पठाइएको छ ।
मंगलबार जिल्ला अदालत धादिङले महिला प्रहरीमाथि बलात्कार प्रयासको आरोप लागेका अपूर्वलाई पुर्पक्षको लागि थुनामा पठाएको हो ।
जिल्ला प्रहरी कार्यालयका प्रवक्ता तथा डिएसपी श्यामबहादुर खत्रीका अनुसार ढुंगानाविरूद्धको अनुसन्धान सकेपछि सरकारी वकिलको कार्यालयले सोमबार अदालतमा मुद्दा दर्ता गरेको र मुद्दा दर्ता भएसँगै मंगलबार बसेको इजलाशले उनलाई थुनामा पठाएको हो ।
गत असोज १६ गते बिहान १ बजेतिर इन्स्पेक्टर अपूर्वले खानीखोलाकै ब्यारेकभित्र महिला प्रहरीमाथि बलात्कारको प्रयास गरेको आरोप छ । पीडित महिला प्रहरीले जाहेरी दिएपछि जिल्ला प्रहरी कार्यालय धादिङले उनलाई पक्राउ गरेको थियो ।
उनी घटनापछि काठमाडौंमा आइपुगेका थिए। तर उनलाई धादिङ फिर्ता बोलाएर पक्राउ गरेको थियो । उनीविरूद्ध प्रहरीले जाहेरी, सिसिटिभी फुटेज, बयान लगायतलाई प्रमाणको रूपमा पेश गरेको छ ।
प्रतिक्रिया राख्नुहोस्