म्यान्मा सङ्घर्षमा चिनियाँ नागरिक हताहतको पुष्टि
म्यान्माको जुन्तासँग सङ्घर्ष गर्ने जातीय सशस्त्र समूहहरूले चीनसँगको सीमामा रहेका मुलुकको उत्तरी क्षेत्रका सीमा चौकीहरू कब्जामा लिएपछि चिनियाँ नागरिक हताहत भएको बेइजिङले पुष्टि गरेको छ ।
![Mynma](https://www.nepaljapan.com/wp-content/uploads/2023/11/Mynma-e1699359011235.png)
मङ्गलबार चिनियाँ विदेश मन्त्रालयका प्रवक्ता वाङ वेनबिनले चिनियाँहरू मारिएको, घाइते भएको वा घटना कहाँ भएको भन्नेबारे बताउनुभएन ।
म्यान्माको स्थानीय सञ्चारमाध्यमहरूले जातीय सशस्त्र समूह कचिन इन्डिपेन्डेन्स आर्मी (केआई) को मुख्यालय लाइजा सहरमा सेनाले गोलाबारी गर्दा एक चिनियाँको मृत्यु भएको र अन्य दुई घाइते भएको शनिबार बताएका थिए । एउटा गोला सीमाको चीनतर्फ खसेको समाचारमा जनाइएको छ ।
“सशस्त्र सङ्घर्ष बढ्दै गएको र चिनियाँ कर्मचारीको हताहतप्रति बेइजिङ गम्भीर असन्तुष्टि व्यक्त गर्दछ”, प्रवक्ता वेनबिनले मङ्गलबार भन्नुभयो, “चीनले सम्बन्धित पक्षहरूसँग गम्भीर विरोध जनाएको छ र उत्तरी म्यान्मामा सङ्घर्षको स्थितिलाई ध्यान दिइरहेको छ ।”
“चीन एक पटक पुनः उत्तरी म्यान्मामा सङ्घर्षमा सहभागी सबै पक्षलाई तुरुन्त गोलाबारी रोक्न माग गर्दछ, सबै पक्षले चीनको सीमावर्ती क्षेत्रमा मानिसको जीवन र सम्पत्तिलाई जोखिममा पार्ने कुनै पनि घटना पुनः नहोस् भनेर यथार्थपरक कदम चाल्नुपर्छ”, उहाँले भन्नुभयो, “बेइजिङले आफ्ना नागरिकको जीवन र सम्पत्तिको रक्षाका लागि आवश्यक कदम चाल्नेछ ।”
चीनले गत साता म्यान्मासँग आफ्नो सीमानजिक बढ्दै गएको लडाइँप्रति चिन्ता व्यक्त गरेको छ । चिनियाँ सहायक विदेशमन्त्री नोङ रोङले शुक्रबारदेखि आइतबारसम्म म्यान्माको भ्रमण गर्नुभएको थियो । उहाँले जुन्ता अधिकारीहरूसँग भेट गरेर चीन–म्यान्मा सीमामा स्थिरता कायम राख्न चीनलाई सहयोग गर्न आग्रह गर्नुभयो ।
“उहाँले जुन्तासँग चिनियाँ सीमा क्षेत्रका बासिन्दाको जीवन र सम्पत्तिको सुरक्षालाई इमान्दारीपूर्वक सुनिश्चित गर्न र म्यान्मामा चिनियाँ कामदार, संस्थान र परियोजनाहरूको सुरक्षा सुदृढ पार्नका लागि प्रभावकारी कदम उठाउन आग्रह गर्नुभएको छ”, बेइजिङको विदेश मन्त्रालयले भनेको छ ।
गत साता संयुक्त आक्रमण सुरु भएदेखि म्यान्मा नेसनल डेमोक्रेटिक अलायन्स आर्मी (एमएनडिएए), ता’आङ नेसनल लिबरेसन आर्मी (टिएनएलए) र अराकान आर्मी (एए) ले आफूहरूले उत्तरी शान राज्यमा दर्जनौँ सैन्य चौकी कब्जामा लिएको बताएका छन् ।
टिएनएलएले मङ्गलबार आफ्नो मिडिया च्यानलमा चिनियाँ सीमा नम्हकम सहरमा उसले करिब सम्पूर्ण नियन्त्रण कायम गरेको बताएको छ ।
प्रतिक्रिया राख्नुहोस्