प्रधानन्यायाधीश र न्यायाधीशहरूको सात दिनको तलब भूकम्प पीडितलाई
सर्वोच्च अदालतका प्रधानन्यायाधीश र न्यायाधीशहरूबाट जाजरकोट भूकम्प पीडितलाई आर्थिक सहयोग गर्ने निर्णय भएको छ ।
![Supreme_Court](https://www.nepaljapan.com/wp-content/uploads/2018/10/Supreme_Court-e1622799261321.png)
प्रधानन्यायाधीशको अध्यक्षतामा बुधबार बसेको पूर्ण बैठकले प्रधानन्यायाधीश र सर्वोच्च अदालतका न्यायाधीशहरूले सात दिनको तलब भूकम्पपीडितलाई दिने निर्णय गरेको हो ।
यही कात्तिक १७ गते गएको भूकम्प र सोपश्चात् गएका परकम्पसमेतबाट पीडित परिवारको सहयोगार्थ उक्त रकम उपलब्ध गराउने निर्णय गरेको हो ।
बैठकले उच्च अदालतका न्यायाधीशको पाँच दिन, जिल्ला अदालतका न्यायाधीशको तीन दिन, राजपत्राङ्कित विशिष्ट र प्रथम श्रेणीका अधिकृतको तीन दिन, अन्य अधिकृतस्तरका कर्मचारीको दुई दिन र सहायकस्तरका कर्मचारीको एक दिन बराबरको तलब स्वेच्छिकरूपमा उपलब्ध गराउने निर्णय गरेको छ ।
बैठकपछि सर्वोच्च अदालतका सहायक प्रवक्ता गोविन्दप्रसाद घिमिरेले जारी गरेको प्रेस विज्ञप्तिमा उक्त रकम प्रधानमन्त्री दैवी प्रकोप उद्धार कोषमा जम्मा गर्ने निर्णय भएको उल्लेख छ ।
प्रतिक्रिया राख्नुहोस्