वन तथा वातावरणमन्त्री ऐनबहादुर शाहीले वायु प्रदूषणको असरले मानवीय, जैविक र पारिस्थितिक प्रणालीलाई ठूलो प्रभाव पार्ने भएकाले यसको न्यूनीकरण र नियन्त्रण गर्नुपर्नेमा जोड दिनुभएको छ ।
राष्ट्रिय मानवअधिकार आयोगद्वारा बिहीबार आयोजित वातावरणीय मानव अधिकार रक्षकको दोस्रो सम्मेलनको उद्घाटन गर्दै उहाँले जलवायु परिवर्तनका कारण बढ्दै गएको वायु प्रदूषण तथा त्यसको स्रोत पहिचान गरी कार्वन उत्सर्जनमा कमी ल्याउनका लागि थप नीतिगत र संस्थागत सुधारका कामलाई प्रभावकारी रुपमा अगाडि बढाउने प्रतिबद्धता व्यक्त गर्नुभयो ।
वायु प्रदूषणले समुदायमा परेको असर न्यूनीकरण र नियन्त्रणमा मन्त्रालय संवेदनशील रहेको बताउँदै मन्त्री शाहीले यसलाई न्यूनीकरण गर्न हरियाली विकास, विद्युतीय सवारीसाधनको प्रयोग वृद्धि गर्नुपर्नेमा जोड दिनुभयो । वन र वातावरणलाई जनताको आयस्तरमा जोडेर मुलुकमा समृद्धि कायम गर्न सकिने उहाँले भनाइ थियो ।
न्यायाधीश सपना मल्ल प्रधानले स्वच्छ वातावरणको अधिकारलाई मौलिक हकमा व्यवस्था गरिएकाले वातावरणीय न्यायका लागि कार्य गर्नुपर्ने बताउनुभयो । वातावरणविद् भूषण तुलाधरले पछिल्लो समय बढ्दै गएकोवायु प्रदूषण तथा त्यसले समाजमा पारेका असरबारे जानकारी गराउनुभयो ।
मानव अधिकार आयोगका अध्यक्ष तपबहादुर मगरले वायु प्रदूषणका नीतिगत सुधारको आवश्यक रहेको बताउँदै विकास र वातावरण नागरिकको हितमा हुने गरी सन्तुलित रुपमा लैजानुपर्ने बताउनुभयो ।
उक्त कार्यक्रममा वन तथा वातावरण संरक्षण क्षेत्रका विज्ञ, सरसफाइ क्षेत्रका कर्मचारी, अधिकारकर्मी वातावरणीय पिडित लगायतको सहभागिता थियो ।
प्रतिक्रिया राख्नुहोस्