सर्वोच्च अदालतले फौजदारी कार्यविधि संहिता संशोधनका लागि सरकारले ल्याएको अध्यादेश विरुद्ध परेको रिट निवेदन हचुवाका भरमा आएको भन्दै दर्ता गर्न अस्वीकार गरेको छ ।
सरकारले ल्याएको अध्यादेश संविधान एवं कानुनविपरीत रहेको भन्दै अधिवक्ता कपिलदेव ढकालको रिट निवेदन अध्यादेश जारी नहुँदै आशङ्काका भरमा ल्याइएको भन्दै दर्ता गर्न अस्वीकार गरेको हो ।
रिट निवेदक ढकालले अध्यादेश प्रमाणीकरण नगर्न राष्ट्रपति कार्यालयको नाममा आदेश जारी गर्न आदेशसमेतको माग राख्नुभएको थियो ।
राष्ट्रपतिबाट प्रमाणीकरण नभएसम्म अध्यादेशले कानुनको स्वरूप धारण नगर्ने भन्दै सर्वोच्च अदालत प्रशासनले जारी नै नभएको उक्त अध्यादेशको संवैधानिकता परीक्षण गर्न नसकिने उल्लेख गर्दै दरपिठ गरिदिएको हो ।
सर्वोच्चका रजिस्ट्रार नारायणप्रसाद पन्थीद्वारा गरिएको दरपिठ आदेशमा भनिएको छ, “नेपालको संविधानको धारा १३३ (१) तथा १३७(२) बमोजिम कानुनको नै संवैधानिकता परीक्षण गर्न सक्ने यस अदालतमा अध्यादेश जारी नहुँदै रोकिपाऊँ भनेर आशङ्काका भरमा रिट निवेदन लिई आएको देखिँदा अपरिपक्व अवस्थामा दर्ता हुन आएको रिट निवेदन दर्ता गर्न मिलेन” ।
प्रतिक्रिया राख्नुहोस्