मृत अवस्थामा पाँच जना फेला

देशका विभिन्न स्थानबाट मृत अवस्थामा पाँच जना फेला परेका छन् । धनकुटा, चौबिसे गाउँपालिका-७ सिमडाँडा बस्ने आफ्नै सम्धी ६० वर्षीय खड्ग बहादुर विश्वकर्माको घरमा तेह्रथुम लालीगुराँस नगरपालिका-८ सोल्पा बस्ने ६४ वर्षीय दिल बहादुर विक सोमबार मृत अवस्थामा फेला परेका छन् ।

त्यस्तै रूकुम पश्चिम, बाफिकोट गाउँपालिका-३ कुनाखेतस्थित सानी भेरी नदीको किनारमा मुसिकोट नगरपालिका-१ पातुखोला बस्ने रूकुम पूर्व पुथा उत्तरगंगा गाउँपालिका-५ हुकाम घर भएका लिला बहादुर घर्ती सोमबार मृत अवस्थामा फेला परेका छन् । यस्तै गुल्मी, इस्मा गाउँपालिका-४ हुल उपल्लो गहते बस्ने ५० वर्षीया मीना दर्लामी आफ्नै घरमा सोमबार मृत अवस्थामा फेला परेकी छिन् ।

यता काभ्रे, मण्डनदेउपुर नगरपालिका-१ गैरीगाउँ घिसिङ टोल बस्ने ५२ वर्षीया तेनमाया तामाङ आफ्नै घरमा आइतबार मृत अवस्थामा फेला परेकी छिन् । उता अर्घाखाँची, सन्धिखर्क नगरपालिका-२ पुलचोक बस्ने ४२ वर्षीया देवकला पुन आफ्नै घरमा आइतबार मृत अवस्थामा फेला परेकी छिन् । यस सम्बन्धमा प्रहरीले आवश्यक अनुसन्धान गरिरहेको छ ।