धनगढीमा जारी लिटल फ्लावर प्रिमियर लिग (एलपीएल)को उपाधि सत्यवती एकेडेमी अत्तरियाले जितेको छ । शनिबार सम्पन्न फाइनलमा सत्यवती एकेडेमीले धनगढी स्पोर्टस् क्लबलाई पाँच रनले पराजित गर्यो । सत्यवतीले दिएको एक सय २७ रनको लक्ष्य पछ्याएको धनगढी स्पोर्टस्ले १९ दशमलव दुई ओभरमा सबै विकेट गुमाएर एक सय २१ रन बनायो ।
धनगढी स्पोर्टस्को ब्याटिङमा वसन्त कार्कीले ३५, सुनिल धमलाले २८ तथा अमरसिंह रौटेलाले २७ रन योगदान दिएता पनि जितका लागि पर्याप्त हुन सकेन । लक्ष्य पछ्याउने क्रममा धनगढी स्पोर्टस्ले ३६ रनमा सुरुआत पाँच विकेट गुमायो । छैटौँ विकेटका लागि वसन्त कार्की र भुवन कार्कीले ३३ रनको साझेदारी गरे । भुवनको विकेटपछि सातौँ विकेटका लागि वसन्तले अमरसिंह रौटेलासँग ४३ रन जोडे । अठारौँ ओभरमा अभिषेक कोइरालाले अमरसिंह रौटेलाको विकेट लिँदै सत्यवतीलाई खेलमा फर्काए । लगत्तै ओभरमा तृतराज दासले वसन्त कार्की र दीपक चन्दको विकेट लिए ।
जितका लागि अन्तिम ओभरमा १० रन आवश्यक हुँदा धनगढी स्पोर्टस् क्लबसँग एक विकेट बाँकी रहेको थियो । अन्तिम ओभर बलिङ गरेका सन्दीप खत्रीले पहिलो बलमा वाइड र दोस्रो बलमा दुई रन दिएपछि तेस्रो बलमा विकास आग्रीको रूपमा धनगढी स्पोर्टस्ले अन्तिम विकेट गुमायो । सत्यवतीको बलिङमा प्लेयर अफ द म्याचसमेत घोषित अभिषेकले सर्वाधिक चार विकेट लिए, जुन क्रममा चार ओभरमा १५ रन खर्चिए । तृतराज दासले दुई तथा फिर्दोस अन्सारी, सन्तोष कार्की र रञ्जित कुमारले एक–एक विकेट लिए ।
यसअघि टस जितेर ब्याटिङ गरेको सत्यवती एकेडेमीले २० ओभरमा छ विकेट क्षतिमा एक सय २६ रन बनायो । सत्यवतीको ब्याटिङमा पाँचौँ नम्बरमा ब्याटिङ गरेका सन्दीप रजालीले सर्वाधिक ४१ रन बनाए । जुन क्रममा उनले ३६ बलमा तीन चौका र तीन छक्का प्रहार गरे । तृतराज दासले १३ बलमा अविजित २७ रन बनाए जुन क्रममा चार चौका र एक छक्का प्रहार गरे । फिर्दोस अन्सारीले २२, सन्तोष कार्की र समिर कार्कीले समान १० रन बनाए ।
पावरप्लेमा तीन विकेट गुमाएको अवस्थाबाट चौथो विकेटका लागि सन्दीप रजाली र फिर्दोस अन्सारीले ६७ रनको साझेदारी गर्दै टिमलाई उकासे । आठौँ विकेटका लागि तृतराज र समिर कार्कीले अविजित ३६ रनको साझेदारी गरे । धनगढी स्पोर्ट्स क्लबको बलिङमा दीपक चन्द, भोजराज भट्ट र भुवन कार्कीले दुई–दुई विकेट लिए ।
विजेता सत्यवती एकेडेमीले विजेता ट्रफीसहित रु दुई लाख ५५ हजार र उपविजेता धनगढी स्पोर्टस् क्लबले रु एक लाख २८ हजार पुरस्कार प्राप्त गरेका छन् । प्रतियोगिताको उत्कृष्ट खेलाडी तथा उत्कृष्ट बलर धनगढी स्पोर्टस् क्लबका कप्तानसमेत रहेका भुवन कार्की घोषित भए । कार्कीले पाँच खेलमा १२ विकेट लिए ।
प्रतियोगिताको उत्कृष्ट ब्याट्सम्यान शुक्लाफाँटा ब्ल्याक बक्सका किरण ठगुन्ना घोषित भए जसले तीन खेलमा एक सय ३४ रन बनाए । प्रतियोगिताका उदयमान खेलाडी कैलाली जिल्ला क्रिकेट क्लबका सुधांशु रावल घोषित भए । प्रतियोगितामा काठमाडौँ, रौतहट, दाङ, कैलाली र कञ्चनपुरका गरी १६ वटा टिमको सहभागिता थियो ।
प्रतिक्रिया राख्नुहोस्